ევროკავშირის ელჩი: მნიშვნელოვანია გაუმჯობესდეს საქართველოს შესახებ აღქმა და აღმოიფხვრას ოლიგარქიული გავლენა
არასამთავრობო ორგანიზაციების მიერ ორგანიზებულ ღონისძიებაზე სიტყვით გამოსვლისას, ევროკავშირის ელჩმა საქართველოში, პაველ ჰერჩინსკიმ ხაზგასმით აღნიშნა, რომ „საქართველოდან უნდა მოდიოდეს დადებითი, კონსტრუქციული სიახლეები, რათა ევროკავშირის ინსტიტუტებსა და 27 წევრ სახელმწიფოს შორის საქართველოს შესახებ აღქმა გაუმჯობესდეს“.
ელჩმა ჰერჩინსკიმ აღიარა 12 პრიორიტეტის განხორციელების კუთხით მიღწეული პროგრესი, თუმცა მოუგვარებელი გადაწყვეტილების განხილვის მნიშვნელობაზე გაამახვილა ყურადღება. მან საქართველოს ხელისუფლებასთან მუშაობის პირობა დადო და თავისი მხარდაჭერა შესთავაზა „ძალიან პოზიტიური ატმოსფეროს შექმნის მიზნით, რომელიც 12 პრიორიტეტის განხორციელებას, ასევე საქართველოს მთლიან აღქმას დაეფუძნება“.
ჟურნალისტებთან საუბრისას ელჩმა 12 პრიორიტეტიდან ერთ-ერთის, დეოლიგარქიზაციის მნიშვნელობას გაუსვა ხაზი და აღნიშნა: „ჩვენ ველით, რომ საქართველო გაუმკლავდება პოლიტიკურ და საზოგადოებრივ ცხოვრებაზე კერძო ინტერესების გადაჭარბებული გავლენის საკითხს“. ვენეციის კომისიის მიერ გამოთქმულ წუხილებზე დაყრდნობით, ელჩმა სისტემურ მიდგომას დაუჭირა მხარი, რომელიც აძლიერებს სახელმწიფო ინსტიტუტებს ანგარიშვალდებულების, გამჭვირვალობის, პოლიტიკური კამპანიებისა და არჩევნების დაფინანსების, მედიის თავისუფლებისა და სასამართლო რეფორმის მეშვეობით.
12 ივნისს ევროკავშირის ელჩებისა და საქართველოს პრემიერმინისტრ ირაკლი ღარიბაშვილის შეხვედრის კომენტირებისას, ჰერჩინსკიმ განაცხადა, რომ შეხვედრა მიზნად ისახავდა ევროკავშირი-საქართველოს ურთიერთობების განხილვას; თუმცა დამატებითი დეტალები მან არ გაამხილა.
ასევე წაიკითხეთ:
- 14/06/2023 – პარლამენტმა ვენეციის კომისიის უგულებელყოფით დე-ოლიგარქიზაციის შესახებ კანონპროექტს კენჭი უყარა
- 13/06/2023 – ვენეციის კომისია საქართველოს მოუწოდებს, არ მიიღოს დეოლიგარქიზაციის შესახებ კანონი
This post is also available in: English (ინგლისური) Русский (რუსული)
