ოლივერ ვარჰეი სალომე ზურაბიშვილს შეხვდა
პრემიერ ღარიბაშვილთან შეხვედრის შემდეგ, ევროპული სამეზობლო პოლიტიკისა და გაფართოების საკითხებში ევროკომისარი, ოლივერ ვარჰეი დღესვე საქართველოს პრეზიდენტს, სალომე ზურაბიშვილს შეხვდა.
- 15/11/2022 – ოლივერ ვარჰეი თბილისს სტუმრობს
საქართველოს პრეზიდენტის ადმინისტრაციის პრესსამსახურის ცნობით, შეხვედრაზე მხარეებმა საქართველოს ევროპული პერსპექტივა, კანდიდატის სტატუსის მინიჭების საკითხი, ასევე ევროკომისიის 12 რეკომენდაციის შესრულების პროცესი განიხილეს და ამ კონტექსტში, პოლარიზაციის დაძლევის მნიშვნელობას გაუსვეს ხაზი.
მათვე უკრაინაში რუსეთის მიერ დაწყებულ სრულმასშტაბიან ომზე, რეგიონში უსაფრთხოების კუთხით არსებულ გარემოზე, შავი ზღვის უსაფრთხოებაზე და მის უმნიშვნელოვანეს როლზე ისაუბრეს ევროპისა და აზიის დაკავშირების მიმართულებით.
„საუბარი ასევე შეეხო, იმ უდიდეს პოტენციალს, რაც რეგიონს და საქართველოს გააჩნია ევროპასთან დამაკავშირებელი ინფრასტრუქტურული, ენერგეტიკული და სატრანსპორტო კორიდორების განვითარების კუთხით“, – ნათქვამია პრეზიდენტის ადმინისტრაციის პრესსამსახურის მიერ გავრცელებულ რელიზში.
ამავე რელიზის თანახმად, ევროკომისარმა აღნიშნა, რომ საქართველოში მისი ჩამოსვლის მიზანი ევროკავშირში საქართველოს ინტეგრაციის პროცესში დახმარებაა. „ამ მიმართულებით გვინდა, რომ თქვენთან ერთად ვიაროთ წინ“, – წერს პრეზიდენტის ადმინისტრაცია ევროკომისრის სიტყვებზე დაყრდნობით.
„ევროკავშირი მოუთმენლად ელის საქართველოს შემოსვლას ჩვენს ევროპულ ოჯახში“, – დაწერა თავის მხრივ ოლივერ ვარჰეიმ Twitter-ზე პრეზიდენტთან შეხვედრის შემდეგ და დასძინა, რომ „მხარს ვუჭერთ საქართველოს, რომ შეასრულოს [ევროკომისიის] 12 პრიორიტეტი“.
„ევროკავშირი მტკიცედ და თანმიმდევრულად ადასტურებს მხარდაჭერას საქართველოს სუვერენიტეტისა და ტერიტორიული მთლიანობისადმი“, – ხაზი გაუსვა მანვე.
#Georgia # Tbilisi – Met President @Zourabichvili_S
The 🇪🇺is looking forward to welcome🇬🇪 into our European family. We support 🇬🇪 to meet its commitments to the 1️⃣2️⃣priorities.
EU strongly & consistently reaffirmed its support 🇬🇪sovereignty & territorial integrity. pic.twitter.com/WcIWILGPVo— Oliver Varhelyi (@OliverVarhelyi) November 15, 2022
This post is also available in: English (ინგლისური) Русский (რუსული)
