ორმხრივი ურთიერთობების გაუარესების ფონზე, ელჩი დანიგანი აშშ-ის მიერ ქართველი ხალხის მხარდაჭერას ადასტურებს
ორ მთავრობას შორის დაძაბული ურთიერთობების ფონზე, აშშ-ის ელჩმა რობინ დანიგანმა 1 აგვისტოს განაცხადა, რომ აშშ გააგრძელებს ქართული საზოგადოების ბევრი სეგმენტის, მათ შორის მასწავლებლების, სტუდენტების, მცირე ბიზნესის მფლობელების, აქტივისტებისა და სამოქალაქო საზოგადოების ორგანიზაციების დახმარებას და რომ აშშ ყოველთვის იქნება „საქართველოს ხალხის მეგობარი და პარტნიორი“. აშშ-ის ელჩმა ეს განცხადება ზუგდიდში დადიანების სასახლეში ადგილობრივ ჟურნალისტებთან საუბრისას გააკეთა.
მას დაუსვეს კითხვები საქართველოს ხელისუფლებისთვის აშშ-ის დახმარების გაყინვის მიზეზებზე, რომელიც ერთი დღით ადრე სახელმწიფო მდივანმა ენტონი ბლინკენმა გამოაცხადა, ასევე ვაშინგტონის მოსალოდნელ ნაბიჯებზე.
ელჩმა კიდევ ერთხელ დაადასტურა ამერიკის ხელისუფლებისა და „ამერიკელი ხალხის აბსოლუტური მხარდაჭერა საქართველოს ხალხის მიმართ“ და აღნიშნა, რომ „ჩვენ უკვე 33 წელია პარტნიორები ვართ. 33 წელია, რაც ერთად ვმუშაობთ“, რათა „ხელი შევუწყოთ საქართველოს დამოუკიდებლობის, მისი სუვერენიტეტისა და ევროატლანტიკური ინტეგრაციის გზას. ჩვენ გავაგრძელებთ ამის გაკეთებას საქართველოს ხალხისთვის“.
საქართველოს ხელისუფლებისთვის პირდაპირი დახმარების შეჩერების შესახებ საუბრისას ელჩმა განაცხადა: „ჩვენ არაერთხელ გვილაპარაკია საქართველოს ხელისუფლების ზოგიერთ ქმედებებზე, რაც ძალიან გვაწუხებს – ზოგიერთი ანტიდემოკრატიული ქმედება, როგორიცაა კანონი უცხოური გავლენის შესახებ, ასევე სხვა ქმედებები და ცრუ განცხადებები აშშ-ის შესახებ, ნეგატიური რიტორიკა შეერთებული შტატებისა და დასავლეთის შესახებ. ჩვენ არაერთხელ გამოვთქვით ჩვენი შეშფოთება და ვთხოვეთ მთავრობას გადახედოს მის ქმედებებს. ჩვენ ასევე ვთქვით, რომ გადავხედავთ ჩვენს ორმხრივ ურთიერთობას“.
შემდეგ მან ხაზგასმით აღნიშნა, რომ დახმარების შეჩერება სწორედ ამ გადახედვის შედეგია და რომ „ის აჩერებს ჩვენი დახმარების გარკვეულ ნაწილს, რომელიც პირდაპირ მთავრობას მიეწოდება“. ელჩმა ასევე განაცხადა, რომ „ჩვენ ვაგრძელებთ სტუდენტების, მასწავლებლების, ფერმერების, მცირე ბიზნესის მფლობელების, სამოქალაქო აქტივისტებისა და სამოქალაქო საზოგადოების ორგანიზაციების მხარდაჭერას“.
„ასევე გაგრძელდება ჩვენი დახმარება საქართველოს თავდაცვის ძალების მიმართ“, – განაცხადა დანიგანმა. „როგორც სახელმწიფო მდივანმა თქვა, ყველაფერი განხილვის პროცესშია“.
მან სინანული გამოხატა იმის გამო, რომ საქართველოს ხელისუფლების ქმედებებს საქართველოს ევროკავშირში გაწევრიანების პროცესის შეჩერება მოყვა. „ჩვენ გვსურს გავაგრძელოთ ერთად მუშაობა, რათა დავეხმაროთ ქართველი ხალხის მისწრაფებების რეალიზებას, გახდეს დასავლური დემოკრატიების ოჯახის წევრი. ჩვენ მზად ვართ აღვადგინოთ ეს ურთიერთობა“.
„იმედი მაქვს, მთავრობა გადადგამს მნიშვნელოვან ნაბიჯებს, რათა დავუბრუნდეთ პირვანდელ კურსს. მინდა გავიმეორო, რომ ჩვენ ყოველთვის ვიქნებით საქართველოს ხალხის მეგობარი და პარტნიორი“, – დასძინა ელჩმა.
ასევე წაიკითხეთ:
- 01/08/2024 – აშშ-ის სახელმწიფო დეპარტამენტი: აშშ-საქართველოს ურთიერთობები „განსაკუთრებით რთულ ეტაპზეა“
- 01/08/2024 – სენატორი ბენ კარდინი მიესალმება „ანგარიშვალდებულების ზომებს საქართველოს დემოკრატიული უკუსვლის საპასუხოდ“
- 01/08/2024 – სენატორები რიში და შაჰინი მიესალმებიან საქართველოსთვის ორმხრივი დახმარების შეჩერებას
- 31/07/2024 – საქართველო აშშ-ის სენატის საგარეო საქმეთა კომიტეტის მოსმენაზე „ევროპის მომავალი“
- 31/07/2024 – ჰელსინკის კომისია ბაიდენის ადმინისტრაციას ბიძინა ივანიშვილის წინააღმდეგ სანქციების დაწესებისკენ მოუწოდებს
This post is also available in: English (ინგლისური)
