NATO PA-მ საქართველოსთან საპარლამენტო საბჭოს მუშაობა შეაჩერა და დელეგაციას პრივილეგიები შეუმცირა
ნატოს საპარლამენტო ასამბლეის მუდმივმოქმედმა კომიტეტმა საქართველო-ნატოს საპარლამენტო საბჭოს შეხვედრები შეაჩერა და ქართულ დელეგაციას პრივილეგიები შეუმცირა, რის მიზეზადაც ქვეყანაში დემოკრატიული უკუსვლა დაასახელა. ასამბლეამ „ნეტგაზეთს“ დაუდასტურა, რომ ეს გადაწყვეტილება მისმა მუდმივმოქმედმა კომიტეტმა 2025 წლის აპრილში დასრულებული ექვსთვიანი მიმოხილვის შემდეგ მიიღო.
იმავდროულად, გამოცემა „ტაბულა“ იტყობინება, რომ ასამბლეამ ქართულ დელეგაციას პლენარულ სესიაზე მონაწილეობის ადგილები ხუთიდან სამამდე შეუმცირა და ამის მიზეზად ის ფაქტი დაასახელა, რომ მომავალში მმართველმა პარტიამ შესაძლოა ამჟამად ბოიკოტის რეჟიმში მყოფი ოპოზიციის ორი ადგილიც გამოიყენოს. შედეგად, საქართველოს დელეგაცია ვეღარ შეძლებს სესიაზე შესწორებების წარდგენას და ვერ მიიღებს მონაწილეობას GSM სემინარებში, ქვედასაკომიტეტო ვიზიტებსა და NATO-ს საორიენტაციო და სხვა სატრენინგო პროგრამებში.
This post is also available in: English