ასლან ბჟანია საავადმყოფოში მოათავსეს

გავრცელებული ინფორმაციით, ოკუპირებული აფხაზეთის „პრეზიდენტობის“ სამი კანდიდატიდან ერთ-ერთი – 56 წლის ასლან ბჟანია, 2 მარტს, განმეორებით „საპრეზიდენტო არჩევნებამდე“ დაახლოებით სამი კვირით ადრე, საავადმყოფოში მოათავსეს.

ადგილობრივი მედია საშუალება Apsny Today დღეს დილით იტყობინებოდა, რომ მოსკოვიდან სოხუმისკენ მიმავალი ასლან ბჟანია გზად სოჭში გაჩერდა, სადაც „თავი შეუძლოდ იგრძნო“.

ბოლო დაახლოებით ერთი წლის განმავლობაში, ეს უკვე მეორე შემთხვევაა, როდესაც ბჟანიას ჯანმრთელობის სერიოზული პრობლემები შეექმნა. ასლან ბჟანია, საბჭოთა KGB-ის სკოლის კურსდამთავრებული, 2019 წლის არჩევნების დროს, აფხაზეთის „პრეზიდენტობის“ კანდიდატის და მოქმედი ლიდერის – რაულ ხაჯიმბას მთავარი კონკურენტი იყო, თუმცა მძიმე ლითონებით მოწამვლის გამო, მან კენჭი ვეღარ იყარა.

ოკუპირებული აფხაზეთის „პრეზიდენტობის მოვალეობის შემსრულებელმა“ ვალერი ბგანბამ დღეს „უშიშროების საბჭოს“ სხდომა გამართა, სადაც ბჟანიას შესახებ ისაუბრეს. გავრცელებული ინფორმაციით, ბჟანიას მოგვიანებით კრასნოდარის საავადმყოფოში გადაიყვანენ.

• ასლან ბჟანია კავკასიაში რუსულ ინტერესებსა და თბილისთან ურთიერთობებზე
• ჯანყი აფხაზეთში: ექსპერტთა თვალით

This post is also available in: English (ინგლისური) Русский (რუსული)