ახალი ამბები

ციხელაშვილის თქმით, ქართველ ექიმს „უახლოეს დღეებში“ გაათავისუფლებენ

Tags

საქართველოს სახელმწიფო მინისტრმა შერიგებისა და სამოქალაქო თანასწორობის საკითხებში ქეთევან ციხელაშვილმა 17 ნოემბერს განაცხადა, რომ ქართველ ექიმს, ვაჟა გაფრინდაშვილს, რომელსაც ცხინვალში „საზღვრის უკანონო გადაკვეთის“ გამო, ორთვიანი წინასწარი პატიმრობა მიესაჯა, „უახლოეს დღეებში“ გაათავისუფლებენ.

„ჩვენ მიერ რამდენიმე არხით მიღებული ინფორმაციით, მისი გათავისუფლება უახლოეს დღეებში მოხერხდება და, რა თქმა უნდა, ძალისხმევა იქითკენ არის მიმართული, რომ ეს რაც შეიძლება მალე მოხდეს“, – განაცხადა ციხელაშვილმა და დასძინა, რომ მის ხელთ არსებული ინფორმაციით, გაფრინდაშვილი თავს ნორმალურად გრძნობს. მანვე ექიმის უკანონო დაკავებაც გააკრიტიკა და მას „აბსურდული“ უწოდა.

პარალელურად, დღეს 12 საათზე, ვაჟა გაფრინდაშვილის „უკანონო დაკავების“ წინააღმდეგ პროტესტის ნიშნად, საქართველოს მასშტაბით, ათასობით ექიმმა თავიანთი საავადმყოფოების წინ ცოცხალი ჯაჭვი შეკრეს. „გვინდა, რომ მთელმა მსოფლიომ და სამყარომ იცოდეს, რომ ეს არ არის სწორი. არ არის სწორი საერთოდ ექიმის დაკავება, რომელიც თავის პროფესიულ მოვალეობას ასრულებს“, – განუცხადა აქციის ერთ-ერთმა მონაწილემ რადიო თავისუფლებას.

საერთაშორისო მხარდაჭერა

ბრიტანეთის ელჩმა საქართველოში ჯასთინ მაკკენზი სმიტმა ციხელაშვილის განცხადების საპასუხოდ განაცხადა, რომ იგი „გულწრფელად“ იმედოვნებს, რომ გაფრინდაშვილის უახლოეს დღეებში გათავისუფლების შესახებ ინფორმაცია დადასტურდება. „როდესაც ჯანდაცვასა და განათლებაზე წვდომა ბევრისთვის სამხრეთ ოსეთში გადამწყვეტი ხდება, რთული გასაგებია, რას მოიგებს რუსეთის მიერ მხარდაჭერილი დე ფაქტო ხელისუფლება მედიცინის სფეროს მუშაკების დაკავებით“, – დაწერა მან Twitter-ზე.

ესტონეთის საგარეო საქმეთა სამინისტრომ კი, ხაზი გაუსვა, რომ ესტონეთი „სრულად უჭერს მხარს საქართველოს სუვერენიტეტს და ტერიტორიულ მთლიანობას მის საერთაშორისოდ აღიარებულ საზღვრებში“ და ოკუპირებულ ცხინვალს ექიმის დაუყონებლივ გათავისუფლებისკენ მოუწოდა.

ასევე წაიკითხეთ:

This post is also available in: English (ინგლისური) Русский (რუსული)

Related Articles

Back to top button