აფხაზეთის შეიარაღებული კონფლიქტის დროს დაკარგული 16 პირის ნეშტი თბილისში გადმოასვენეს
შერიგებისა და სამოქალაქო თანასწორობის საკითხებში სახელმწიფო მინისტრის აპარატმა 5 აგვისტოს განაცხადა, რომ 1992-1993 წლების აფხაზეთის შეიარაღებული კონფლიქტის შედეგად უგზო-უკვლოდ დაკარგული 16 პირის იდენტიფიცირებული ნეშტი ოჯახებს გადაეცა. მათგან შვიდი სამხედრო პირი, ხოლო 9 მშვიდობიანი მოქალაქეა.
გადმოსვენება განხორციელდა სახელმწიფო მინისტრის აპარატისა და წითელი ჯვრის საერთაშორისო კომიტეტის ერთობლივი თანამშრომლობით, ქართველი და აფხაზი მონაწილეებისგან შემდგარი საკოორდინაციო მექანიზმის ფარგლებში, რომელიც წითელი ჯვრის მხარდაჭერით 2010 წელს შეიქმნა.
სახელმწიფო მინისტრის აპარატის ინფორმაციით, 4 მებრძოლს დიღმის ძმათა სასაფლაოზე, დანარჩენებს კი, ოჯახების გადაწყვეტილებით, სხვადასხვა ლოკაციაზე, მათ შორის საგვარეულო სასაფლაოებზე სამხედრო პატივით დაკრძალავენ. შეიარაღებული მოქმედებების დროს დაღუპულთა სამოქალაქო პანაშვიდი ორი დღის განმავლობაში სამების საკათედრო ტაძარში გაიმართება.
„1990-იანი წლების შეიარაღებული მოქმედებებისა და 2008 წლის აგვისტოს ომში უგზო-უკვლოდ დაკარგულთა მოძიების მექანიზმების ფარგლებში, მუშაობის აქტიური ფაზა 2013 წლიდან დაიწყო. ამ დრომდე, მექანიზმების ფარგლებში, ნაპოვნია 621 ადამიანის ნეშტი, მათგან იდენტიფიცირებულია 316. 2000-მდე ადამიანი ჯერ კიდევ უგზო-უკვლოდ დაკარგულად მიიჩნევა“, – აცხადებს სახელმწიფო მინისტრის აპარატი.
ასევე წაიკითხეთ:
- 07/12/2024 – აფხაზეთის შეიარაღებული კონფლიქტის დროს დაკარგული 23 პირის ნეშტი თბილისში გადმოასვენეს
- 07/12/2022 – აფხაზეთის შეიარაღებული კონფლიქტის დროს დაკარგული 11 პირის ნეშტი თბილისში გადმოასვენეს
- 24/04/11 – აფხაზეთის შეიარაღებული კონფლიქტის დროს დაკარგული 13 პირის ნეშტი გადმოასვენეს
This post is also available in: English (ინგლისური) Русский (რუსული)
