გერმანიამ საქართველოში მყოფ უკრაინელ ლტოლვილებს 5 მილიონი ევრო გამოუყო

გერმანიის საგარეო საქმეთა სამინისტრომ ომისაგან დაზარალებული საქართველოში მყოფი უკრაინელი ლტოლვილების დასახმარებლად მუშა სამარიტელთა კავშირს (ASB) მომდევნო 18 თვისთვის ხუთი მილიონი ევრო გამოუყო.

პროექტის დაწყების შესახებ ინფორმაცია 2023 წლის 18 ივლისს გამართულ  პრესკონფერენციაზე გამოცხადდა, სადაც გერმანიის ელჩმა პეტერ ფიშერმა ASB საქართველოს დირექტორს კლემენს ფონ ჰაიმენდალს  სიმბოლური ჩეკი გადასცა.

პროექტის მიზანს წარმოადგენს უკრაინელი ლტოლვილების მდგომარეობის გაუმჯობესება და მათი საჭიროებების დაკმაყოფილება. პროექტს ASB საქართველო ახორციელებს თავის პარტნიორ ორგანიზაციებთან “Unite Together” და „საქართველოს სამარიტელთა კავშირთან“ ერთად.

პრესკონფერენციაზე ითქვა, რომ ამ დროისთვის საქართველოში 25-26 ათასი უკრაინელი ლტოლვილი იმყოფება, რომელთა ერთ-ერთ მთავარ გამოწვევად რჩება უმუშევრობა და ეკონომიკური სირთულეები. დახმარების პაკეტი მოიცავს 7200 პირისთვის სხვადასხვა მიზნობრიობის ფულად დახმარებას, 2000 პირისთვის ფსიქოლოგიური დახმარების გაწევას, გამოზამთრებისთვის ფულად დახმარებას 3000 პირისთვის და სხვ.

ასევე წაიკითხეთ:

• 26/02/2022 – საქართველოს მთავრობა უკრაინის ჰუმანიტარული დახმარებისთვის 1 მლნ ლარს გამოყოფს
• 11/09/2014 – საქართველო უკრაინაში ჰუმანიტარულ ტვირთს გზავნის

This post is also available in: English (ინგლისური) Русский (რუსული)