ევროკავშირის მედიაცია: ქრისტიან დანიელსონი საქართველოში დაბრუნდება
ევროპული საბჭოს პრეზიდენტმა, შარლ მიშელმა დღეს განაცხადა, რომ მისი სპეციალური წარმომადგენელი საქართველოში პოლიტიკური კრიზისის მედიაციის საკითხებში, ქრისტიან დანიელსონი თბილისში დაბრუნდება და მედიაციას განაგრძობს.
დანიელსონი ქართულ ოცნებასა და ოპოზიციას შორის 12-18 მარტის მოლაპარაკებებს უწევდა მედიაციას, თუმცა მხარეებმა მცირე წარმატებას მიაღწიეს.
„საქართველოს მოქალაქეების ინტერესების შესაბამისად საჭირო კომპრომისებზე წასვლის დროა“ – დაწერა შარლ მიშელმა Twitter-ზე.
ქრისტიან დანიელსონი საქართველოში 12 მარტს ჩამოვიდა და ქვეყანა 14 მარტს უნდა დაეტოვებინა, თუმცა, მოგვიანებით, ვიზიტის გახანგრძლივება გადაწვიტა და თქვა, რომ მხარეებს კონსენსუსის მისაღწევად მეტი დრო სჭირდებოდათ.
პრემიერის პოსტზე ირაკლი ღარიბაშვილის არჩევიდან რამდენიმე საათში ერთიანი ნაციონალური მოძრაობის თავმჯდომარის, ნიკა მელიას დაკავებით ქვეყანაში გამწვავებული პოლიტიკური კრიზისის მედიაცია ევროპული საბჭოს პრეზიდენტმა, შარლ მიშელმა იტვირთა. ოპოზიციური პარტიების დიდი ნაწილი ოქტომბრის საპარლამენტო არჩევნების „მასობრივი გაყალბების“ გამო მის შედეგებს არ ცნობს და ახალ პარლამენტს ბოიკოტს უცხადებს.
პრეზიდენტ მიშელის განცხადებას წინ უძღვოდა დღესვე ევროკავშირის საგარეო საქმეთა საბჭოში გამართული დისკუსია, სადაც, სხვა საკითხებთან ერთად, საქართველოში არსებული სიტუაციაც განიხილეს. ევროკავშირის უმაღლესმა წარმომადგენელმა საგარეო პოლიტიკისა და უსაფრთხოების საკითხებში, ჟოზეპ ბორელმა შეხვედრის შემდეგ განაცხადა: „ეს სამუშაო [ევროკავშირის მედიაციის] გრძელდება და მინდა კიდევ ერთხელ გავიმეორო, რომ საჭიროა ქართული პარტიების ყველა ლიდერმა ყველაზე მაღლა ქართველი ხალხის ინტერესები დააყენოს, რათა საჭირო კომპრომისებზე წავიდნენ და ყურადღება გადაუდებელ საკითხებს მიაქციონ“.
ასევე წაიკითხეთ:
- ევროკავშირის მედიაცია: შეთანხმება ვერ შედგა, დანიელსონი ბრიუსელში გაემგზავრა
- ოპოზიცია მუშაობის „საგანგებო რეჟიმზე“ გადადის და 15 მაისს მასშტაბურ აქციას გეგმავს
- ევროკავშირთან საქართველოს მისიის ხელმძღვანელი გადადგა
This post is also available in: English (ინგლისური) Русский (რუსული)
