ახალი ამბები

ლომჯარია პარლამენტის პიკეტირებაზე პასუხისმგებელობას ოცნების დეპუტატებს აკისრებს

Tags

საქართველოს სახალხო დამცველი ნინო ლომჯარია პარლამენტის შენობის პიკეტირებას ეხმაურება, ამბობს, რომ ეს კანონიერი არ არის, თუმცა ომბუდსმენი ამ უკანონობაზე პასუხისმგებლად იმ დეპუტატებს მიიჩნევს, რომლებმაც 2020 წლის საპარლამენტო არჩევნების სრულად პროპროციულ სისტემით ჩატარების შესახებ საკონსტიტუციო ცვლილებებს მხარი არ დაუჭირეს.

14 ნოემბერს გამართულ პარლამენტის პლენარულ სხდომაზე, ქართული ოცნების მიერ ინიცირებულ კონსტიტუციურ კანონპროექტს მხარი საპარლამენტო ოპოზიციის 44-ვე დეპუტატმა დაუჭირა, თუმცა ცვლილებების მომხრე უმრავლესობის მხოლოდ 57 დეპუტატი აღმოჩნდა. ქართული ოცნების 37-მა დეპუტატმა, რომელიც სხდომას ესწრებოდა, კენჭისყრაში მონაწილეობისგან თავი შეიკავა, 3-მა კი ხმა წინააღმდეგ მისცა. კანონპროექტის პირველი მოსმენით მიღებას ჯამში 113 დეპუტატის მხარდაჭერა სჭირდებოდა.

უფრო დიდი უკანონობა ის მგონია, ხალხს უთხრა, ვისაც მხარს დაუჭერ, იმას პარლამენტში არ შევუშვებო, პარტიებს უთხრა, იმ რაოდენობით არ შეგიშვებ პარლამენტში, რა მხარდაჭერაც გაქვსო და შესაბამისად, როდესაც ოპოზიციას, ახალ პოლიტიკურ ძალებს არ აძლევ პარლამენტში შესვლის შესაძლებლობას, არც ისინი შეგიშვებენ პარლამენტში“, – წერს ლომჯარია Facebook-ის საკუთარ გვერდზე რამდენიმე წუთის წინ გამოქვეყნებულ პოსტში. 

ომბუდსმენი მიიჩნევს, რომ პოლიტიკურ კრიზის სწორედ მაჟორტარული სისტემა ქმნის და ამის დასტური დამოუკიდებელი საქართველოს პოლიტიკური ისტორიაა. მისივე თქმით, თუკი მაჟორიტარ დეპუტატებს თვითმმართველობის პრობლემები აწუხებდათ, დეცენტრალიზაციის აქამდე რეფორმა უნდა გაეტარებინათ.

„სწორედ იმიტომ არიან ისინი პარლამენტში, რომ პოლიტიკური რეფორმები გაატარონ და არა იმიტომ, რომ გზები დააგონ, მილები ჩაყარონ, ან სკოლები არემონტონ“, – წერს ნინო ლომჯარია. 

17 ნოემბერს ვადამდელი პროპორციული არჩევნების ჩატარების მოთხოვნით, საპარლამენტო და არასაპარლამენტო ოპოზიციის თითქმის სრულმა სპექტრმა და სამოქალაქო აქტივისტებმა პარლამენტის შენობასთან საპროტესტო აქცია გამართეს. იმავე მოთხოვნით, რესპუბლიკის მოედანზე აქცია პატრიოტთა ალიანსმაც გამართა. 

მოგვიანებით აქციის ორგანიზატორების ნაწილმა და აქტივისტებმა პარლამენტის ყველა შესასვლელის პიკეტირება მოახდინეს და საკანონმდებლო ორგანოში შესასვლელ ყველა კარს ბოქლომი დაადეს. ასევე, ადგილზე კარვები გაშალეს და ბარიკადები მოაწყეს. ისინი ამბობენ, რომ ქართული ოცნების დეპუტატები პარლამენტის შენობაში შესვლას მხოლოდ მაშინ შეძლებენ, როდესაც მათი მოთხოვნა დაკმაყოფილდება.

ასევე წაიკითხეთ:

This post is also available in: English (ინგლისური) Русский (რუსული)

Related Articles

Back to top button