ახალი ამბები

ომბუდსმენმა 20-21 ივნისის აქციის დაშლის საქმის შესწავლა დაიწყო

Tags

სახალხო დამცველის აპარატმა 20-21 ივნისს შინაგან საქმეთა სამინისტროს თანამშრომლების მიერ სამსახურებრივი უფლებამოსილების სავარაუდო გადამეტების ფაქტზე მიმდინარე სისხლის სამართლის საქმის შესწავლა დაიწყო.

გენერალურმა პროკურატურამ 24 ივნისს განაცხადა, რომ 20-21 ივნისს რუსთაველის გამზირზე მიმდინარე აქციის დროს სამართალდამცველების მხრიდან ცალკეული მონაწილეების მიმართ უფლებამოსილების შესაძლო გადამეტების ფაქტზე გამოძიება დაიწყო. შინაგან საქმეთა სამინისტრომ კი, აქციის დაშლის ოპერაციაში მონაწილე 10 სამართალდამცველს სამსახურებრივი უფლებამოსილება შეუჩერა.

დღეს გავრცელებული განცხადების თანახმად, სახალხო დამცველის აპარატი გამოძიების პროცესს „დამოუკიდებლობის, დროულობის, ზედმიწევნითობის, კომპეტენტურობისა და დაზარალებულის ჩართულობის“ კრიტერიუმებით, საერთაშორისო სტანდარტების გათვალისწინებით შეაფასებს.

გამოძიების მონიტორინგის ფარგლებში, სახალხო დამცველის აპარატი შეისწავლის:

  • „ჩატარდა თუ არა ყველა აუცილებელი საგამოძიებო/საპროცესო მოქმედება;
  • ეს მოქმედებები ჩატარდა თუ არა დროულად;
  • ხომ არ არის სახეზე გამოძიების პროცესის არაგონივრული გაჭიანურება;
  • ჩატარებული საგამოძიებო მოქმედებები ტარდებოდა თუ არა ჯეროვანი გულისხმიერებით და ამომწურავად“.

განცხადებაში ასევე აღნიშნულია ისიც, რომ ომბუდსმენის აპარატისათვის „მიმდინარე გამოძიების მონიტორინგის სპეციფიკა ექსტრაორდინალურია“, თუმცა, „მიუხედავად ამ მიმართებით შესაბამისი გამოცდილების არქონისა, სახალხო დამცველის აპარატი გააკეთებს ყველაფერს, რათა გამოძიება ადამიანის უფლებების სტანდარტების შესაბამისად შეაფასოს მიმდინარე რეჟიმში და საბოლოოდ მიაწოდოს რეკომენდაციები სისხლის სამართლის საქმის ზედამხედველ პროკურორებს“.

ომბუდსმენის აპარატის განმარტებით, „გამოძიების მონიტორინგის ეფექტურობისა და გამჭვირვალობის მიზნით სახალხო დამცველი შექმნის საკონსულტაციო საბჭოს, რომლის შემადგენლობაში სხვადასხვა ჯგუფები, არასამთვრობო ორგანიზაციები და პროფესიული წრეები იქნებიან წარმოდგენილი“.

სახალხო დამცველის აპარატი ასევე მოუწოდებს მოქალაქეებს, საგამოძიებო ორგანოებთან ითანამშრომლონ და მათ ხელთ არსებული ამომწურავი ინფორმაცია მიაწოდონ, გამოძიების პროცესთან პრეტენზიების არსებობის შემთხვევაში კი, ომბუდსმენის აპარატს მიმართონ.

თბილისში საპროტესტო აქციები 20 ივნისს საქართველოს პარლამენტში რუსეთის დუმის კომუნისტი დეპუტატის სერგეი გავრილოვის გამოსვლას მოჰყვა, რომელმაც მართლმადიდებლობის პარლამენტთაშორისი ასამბლეის სხდომის მონაწილეებს საქართველოს პარლამენტის თავმჯდომარის სავარძლიდან მიმართა.

აქციის პირველი დღე სამართალდამცველებმა ძალის გამოყენებით დაშალეს, თუმცა ამას პროტესტის მუხტი არ შეუნელებია. უკვე 12 დღეა პარლამენტის წინ აქციები იმართება. რამდენიმე ათასი ადამიანი შს მინისტრის გადადგომას ითხოვს. მათ მოთხოვნებში ასევე იყო აქციაზე დაკავებული პირების გათავისუფლება და 2020 წლის საპარლამენტო არჩევნების პროპორციული სისტემით ჩატარება, რაც უკვე დაკმაყოფილდა.

საზოგადოების პროტესტის ფონზე თანამდებობა პარლამენტის თავმჯდომარემ ირაკლი კობახიძემ დატოვა. ქართული ოცნების კიდევ ერთმა დეპუტატმა ზაქარია ქუცნაშვილმა კი დეპუტატის მანდატის დატოვების მზადყოფნა გამოთქვა. ქუცნაშვილი სწორედ იმ ღონისძიების ერთ-ერთი ორგანიზატორი იყო, რასაც თბილისსა და რეგიონებში ფართომასშტაბიანი საპროტესტო ტალღა მოჰყვა.

This post is also available in: English (ინგლისური) Русский (რუსული)

Back to top button