Placeholder canvas
არჩევნები 2018ახალი ამბები

ზურაბიშვილმა საქართველოში თითქმის ყველა ოლქი მოიგო, ავღანეთში და უცხოეთში კი წააგო

საარჩევნო უბნებზე ხმების დათვლის პროცესი დასრულდა. წინასწარი შედეგების მიხედვით, მმართველი პარტიის მიერ მხარდაჭერილმა კანდიდატმა სალომე ზურაბიშვილმა საპრეზიდენტო არჩევნები მნიშვნელოვანი უპირატესობით მოიგო.

3 705 უბნის შედეგებით, სალომე ზურაბიშვილმა 1 147 627 ხმა მიიღო, რაც ამომრჩეველთა საერთო რაოდენობის 59.52%-ია. მის მეტოქეს, გაერთიანებული ოპოზიციის კანდიდატს გრიგოლ ვაშაძეს კი, მხარი 780 633-მა ამომრჩეველმა დაუჭირა, რაც ხმების საერთო რაოდენობის 40.48 %-ია.

საპრეზიდენტო არჩევნების პირველ ტურში, რომელიც 28 ოქტომბერს გაიმართა, ზურაბიშვილმა 615 572 ხმა (38.64 %), ხოლო ვაშაძემ 601 224 ხმა (37.74 %) მიიღო.

ცენტრალური საარჩევნო კომისიის სპეციალურ ვებგვერდზე განთავსებული შემაჯამებელი ოქმების თანახმად, სალომე ზურაბიშვილმა არჩევნები საქართველოს თითქმის ყველა ოლქში მოიგო, მათ შორის, თბილისის ათივე ოლქში.

ყველაზე მეტი ხმა ზურაბიშვილმა საჩხერეში მიიღო – 91.78 % (24 810 ხმა), შემდეგ მოდის ყაზბეგის, ლენტეხის და მესტიის ოლქები ხმების 79.34 %-ით (1 986 ხმა), 77.08 %-ით (2 247) და 76.55 %-ით (3 854).

საქართველოს მასშტაბით, ზურაბიშვილმა მხოლოდ ორ ოლქში – თელავსა და რუსთავში წააგო, სადაც მან, ხმების 48.81 % (15 868) და 48.49 % (26 689) მიიღო. ვაშაძემ ეს ორი ოლქი ხმების 51.19 %-ით (16 644) და 51.51 %-ით (28 349) მოიგო.

რაც შეეხება საზღვარგარეთ განთავსებულ უბნებს, ოპოზიციის კანდიდატმა ხმების 64.24 % (6 135), მისმა კონკურენტმა კი – ხმების 35.76 % (3 415) მოიპოვა. ამაში ასევე შედის ავღანეთში ქართველი სამხედროებისთვის გახსნილი ორი უბანი, სადაც ვაშაძემ 452 ხმა, ზურაბიშვილმა კი – 362 ხმა მიიღო.

ცესკოს ინფორმაციით, არჩევნების მეორე ტურში 1 975 845 ამომრჩეველი მონაწილეობდა, რაც ამომრჩევლების საერთო რაოდენობის 56.23 %-ია. პირველ ტურთან შედარებით, მეორე ტურში ამომრჩევლის აქტივობა გაცილებით მაღალი იყო. 28 ოქტომბერს არჩევნებში 1 647 878 ამომრჩეველი მონაწილეობდა, რაც ამომრჩევლის საერთო რაოდენობის 46.83 % იყო.

მეორე ტურისთვის საზღვარგარეთ 15 000-ზე მეტი ამომრჩეველი დარეგისტრირდა. მათთვის 40 ქვეყანაში 57 საარჩევნო საარჩევნო უბანი გაიხსნა.

This post is also available in: English (ინგლისური) Русский (რუსული)

მსგავსი/Related

Back to top button