შსს: საკანონმდებლო ცვლილებების სამიზნე საპროტესტო აქციების უცხოელი მონაწილეები იქნებიან
„ქართული ოცნების“ პარლამენტში წარდგენილი საკანონმდებლო ცვლილებების ფარგლებში, უფრო გამარტივდება უცხოელების გაძევება და ქვეყანაში მათი ხელახლა შემოსვლის აკრძალვა, ხოლო ცვლილებების სამიზნეები რეჟიმის წინააღმდეგ მიმდინარე საპროტესტო აქციების უცხოელი მონაწილეები არიან. „ქართული ოცნების“ შინაგან საქმეთა მინისტრის მოადგილემ ალექსანდრე დარახველიძემ 13 მაისს ცვლილებების პაკეტი დეპუტატებს წარუდგინა.
საკანონმდებლო პაკეტით, რომლის მიზანიც იმიგრაციის კონტროლის გამკაცრება და უცხო ქვეყნის მოქალაქეებისკენ მიმართული სხვა ზომების მიღებაა, იცვლება ქვეყნის მიდგომა უცხო ქვეყნის მოქალაქეების გაძევებასთან დაკავშირებით და ინერგება ბიომეტრიული მონაცემების შეგროვების ახალი ზომები და უფრო მკაცრი ჯარიმები ადმინისტრაციული და სისხლის სამართლის დანაშაულისთვის. საქართველოს ადმინისტრაციულ სამართალდარღვევათა კოდექსში შემოთავაზებული ცვლილებები ორ ახალ ჯარიმას ითვალისწინებს კონკრეტულად უცხო ქვეყნის მოქალაქეებისთვის: საქართველოდან გაძევება და შემოსვლის აკრძალვა. ისეთმა დანაშაულებმა, როგორიცაა წვრილმანი ხულიგნობა სამართალდამცავი ორგანოების ბრძანებების დაუმორჩილებლობა, საზოგადოებრივ-პოლიტიკური პირის სიტყვიერი შეურაცხყოფა ან საზოგადოებრივი თავშეყრის ორგანიზებასთან ან მონაწილეობასთან დაკავშირებულმა დარღვევამ შეიძლება გამოიწვიოს ეს ჯარიმები, მათ შორის შემოსვლის აკრძალვა სამ წლამდე ვადით. პაკეტი დეპუტატებმა პირველი მოსმენით 81 ხმით მიიღეს. წინააღმდეგ ხმა არც ერთმა დეპუტატმა მისცა.
საკანონმდებლო ორგანოში გამოსვლისას, დარახველიძემ განაცხადა, რომ ბოლო თვეებში აქციებში არაერთი უცხოელი მონაწილეობდა, რომლებიც „დესტრუქციულ ქმედებებში იყვნენ ჩართული“. მისი თქმით, მიუხედავად იმისა, რომ სხვადასხვა ადმინისტრაციული სამართალდარღვევისთვის დამნაშავედ ცნობილ უცხოელ მოქალაქეებს ჯარიმები დაეკისრათ და ადმინისტრაციული პატიმრობაც იქნა გამოყენებული, „გაძევების არანაირი მექანიზმი არ არსებობდა“. აღნიშნა რა, რომ ეს უცხოელები საქართველოში „დესტრუქციული მიზნებით“ შემოდიან, დარახველიძემ განაცხადა, რომ „გამოყენებული იყოს ღონისძიება – ქვეყნიდან გაძევება და გარკვეული ვადით ქვეყანაში შემოსვლის აკრძალვა. ეს მოგვცემს იმის საშუალებას, რომ საზოგადოებრივი წესრიგი და უსაფრთხოება იყოს დაცული“.
„დიდია იმ ქვეყნების ჩამონათვალი, ვისი მოქალაქეებიც აქციებში იყვნენ ჩართული“, – განაცხადა მან, თუმცა იქვე აღნიშნა, რომ ჯარიმებმა და დაკავებებმა შეამცირეს აქციებში მონაწილე უცხოელების რაოდენობა. დარახველიძემ ასევე განმარტა, რომ ვინაიდან მათ საქართველოში უვიზოდ დარჩენის ერთწლიანი ვადა ჰქონდათ, მათი გაძევების პროცედურის დაწყება ვერ მოხერხდა.
რეჟიმის საწინააღმდეგო საპროტესტო აქციები საქართველოში 2024 წლის ნოემბრიდან მიმდინარეობს მას შემდეგ, რაც სადავო არჩევნებიდან ერთი თვის თავზე, „ქართულმა ოცნებამ“ ევროკავშირში გაწევრიანების პროცესის შეჩერების გადაწყვეტილება მიიღო.
ასევე წაიკითხეთ:
- 09/05/2025 – ბელარუსი აქტივისტი საქართველოში არ შემოუშვეს
This post is also available in: English Русский