პრეზიდენტმა ზურაბიშვილმა ესტონეთში ვიზიტით ბალტიის ქვეყნებში ტურნე დაასრულა
ბალტიის ქვეყნებში ტურნეს დასასრულს, საქართველოს პრეზიდენტი სალომე ზურაბიშვილი 28 მარტს ესტონეთის მაღალი რანგის ოფიციალურ პირებს შეხვდა, მათ შორის პრეზიდენტ ალარ კარისს, რიიგიკოგუს სპიკერს ლაური ჰუსარს და ესტონეთის პარლამენტის საგარეო ურთიერთობათა კომიტეტის თავმჯდომარეს მარკო მიხელსონს.
„ესტონეთი ჩვენ გვერდით დგას ჩვენს ევროპულ გზაზე და მხარს უჭერს ქართველი ხალხის მოწოდებას ახალი, თავისუფალი და სამართლიანი არჩევნების ჩატარებისკენ“, – დაწერა ზურაბიშვილმა X-ზე.
ესტონელ კოლეგასთან შეხვედრის შემდეგ პრეზიდენტმა ზურაბიშვილმა X-ზე დაწერა: „შევხვდი ალარ კარისს. მან გადმოგცათ თქვენ, ქართველ ხალხს, თავისი ურყევი მხარდაჭერა თქვენს გადამწყვეტ ბრძოლაში ჩვენი ევროპული მომავლისთვის“.
იგი ასევე შეხვდა რიიგიკოგუს [ესტონეთის პარლამენტის] სპიკერს ლაური ჰუსარს ლაური ჰუსარს და განაცხადა: „შევხვდი ლაური ჰუსარს, რომელმაც მტკიცედ დაადასტურა თავისი მხარდაჭერა საქართველოსა და ქართველი ხალხისადმი ჩვენს ურყევ სწრაფვაში დემოკრატიული არჩევნებისკენ. მადლობა თქვენი პერსონალური მხარდაჭერისთვის!“
მარკო მიხელსონთან და საგარეო ურთიერთობათა კომიტეტის წევრებთან შეხვედრის შემდეგ, ზურაბიშვილმა განაცხადა, რომ მათ ხაზგასმით აღნიშნეს, რომ „მიუხედავად იმისა, რომ დღეს ევროპის უსაფრთხოების წინაშე უამრავი გამოწვევაა, საქართველო სასიცოცხლოდ მნიშვნელოვანია და უნდა იყოს ევროკავშირის დღის წესრიგში“.
ვიზიტის ფარგლებში სალომე ზურაბიშვილი ასევე შეხვდა ესტონეთის საგარეო საქმეთა მინისტრს მარგუს ცაჰკნას, რომელმაც შეხვედრის შემდეგ დაწერა, რომ ესტონეთი „მზარდი შეშფოთებით ადევნებს თვალს, როგორ უთხრის ძირს „ქართული ოცნება“ საქართველოში დემოკრატიას და არღვევს ადამიანის უფლებებს. ესტონეთი აქტიურად უჭერს მხარს საქართველოს დემოკრატიულ ძალებს და აგრძელებს თქვენა გვერდით დგომას“.
პრეზიდენტმა ზურაბიშვილმა ასევე მიიღო მონაწილეობა მრგვალ მაგიდაში, რომელიც ესტონეთის თავდაცვისა და უსაფრთხოების საერთაშორისო ცენტრში (ICDS) გაიმართა და სადაც მან ქვეყანაში მიმდინარე პოლიტიკურ კრიზისსა და შესაძლო გამოსავალზე ისაუბრა.
ბალტიის ქვეყნებში ტურნეს ფარგლებში, ზურაბიშვილი 26 მარტს ლატვიას ეწვია, სადაც ლატვიელ კოლეგას ედგარს რინკევიჩს, სეიმის თავმჯდომარის მოადგილეს ზანდა კალნინა-ლუკაშევიცას და ლატვიის სეიმის საგარეო ურთიერთობათა კომიტეტის წევრებს შეხვდა.
25 მარტს სალომე ზურაბიშვილი ლიეტუვას ეწვია, სადაც პრეზიდენტ გიტანას ნაუსედას, პარლამენტის სპიკერს საულიუს სკვერნელისს, ვიცე-სპიკერს რადვილე მორკუნაიტეს და რამდენიმე დეპუტატს, მათ შორის ლაურინას კასიუნასს, ჟიგიმანტას პავილიონისს და ინგრიდა შიმონიტეს შეხვდა.
ასევე წაიკითხეთ:
- 20/03/2025 – სალომე ზურაბიშვილი ევროკავშირის ლიდერებს ევროპული საბჭოს სხდომაზე საქართველოზე მსჯელობისკენ მოუწოდებს
- 27/02/2025 – სალომე ზურაბიშვილმა ახალი არჩევნების გეგმა წარმოადგინა
This post is also available in: English (ინგლისური) Русский (რუსული)