ცესკო: 15 საათის მდგომარეობით ამომრჩეველთა აქტივობამ 41.62% შეადგინა

ცენტრალური საარჩევნო კომისიის (ცესკო) ინფორმაციით, 15 საათისთვის საქართველოს მასშტაბით საპარლამენტო არჩევნებზე მისულ მოქალაქეთა რაოდენობა 1 454 837-ია, რაც  რეგისტრირებული ამომრჩევლების 41.62%-ს შეადგენს.

ეს დაახლოებით 5 პროცენტით მეტია, ვიდრე წინა არჩევნებზე, თუმცა უფრო დაბალია, ვიდრე 2012 წლის არჩევნების 15:00 საათზე, რომელმაც „ქართული ოცნება“ ხელისუფლებაში მოიყვანა.

2020 წლის საპარლამენტო არჩევნებზე 15:00 საათზე ამომრჩეველთა აქტივობამ 36.45% შეადგინა, საბოლოო აქტივობამ კი 56.11%.

დღევანდელ გადამწყვეტ საპარლამენტო არჩევნებში 3 111 საარჩევნო უბანზე ხმის მიცემის უფლება 3 508 294 საქართველოს მოქალაქეს აქვს. საარჩევნო უბნები საღამოს 8 საათზე დაიხურება და ძირითადად ელექტრონული ხმის მიცემის წინასწარი ოფიციალური შედეგები უახლოეს საათებში გახდება ცნობილი. ცესკო საბოლოო შედეგების გამოცხადებას 27 ოქტომბრის დილით, ყველა ბიულეტენის ხელით ხელახალი დათვლის შემდეგ გეგმავს.

This post is also available in: English (ინგლისური) Русский (რუსული)