ახალი ამბები

48 დეპუტატი გმობს აშშ-ისა და ევროკავშირის წინააღმდეგ ხელისუფლების „ცილისმწამებლურ“ კამპანიას

საქართველოს პარლამენტის 48 ოპოზიციონერი და დამოუკიდებელი დეპუტატი გმობს ომში ჩართვაზე საქართველოს მთავარი სტრატეგიული პარტნიორების – აშშ-ისა და ევროკავშირის წინააღმდეგ ხელისუფლების „ცილისმწამებლურ და დეზინფორმაციულ კამპანიას“ და საქართველოში აშშ-ის მოქმედ ელჩს, კელი დეგნანსა და ევროკავშირის ყოფილ ელჩს, კარლს ჰარცელს „სრულ მხარდაჭერას“ უცხადებს.

ერთობლივ განცხადებას ხელს აწერენ დეპუტატები შემდეგი ოპოზიციური პარტიებიდან: ერთიანი ნაციონალური მოძრაობა; ყოფილი პრემიერის პარტია საქართველოსთვის; სტრატეგია აღმაშენებელი; ლელო საქართველოსთვის; რესპუბლიკური პარტია; კანონი და სამართალი. ასევე რამდენიმე დამოუკიდებელი დეპუტატი. ხელმომწერებს შორის არ არიან მოქალაქეების, გირჩისა და ევროპელი სოციალისტების დეპუტატები.

4 აგვისტოს გავრცელებულ ერთობლივ წერილში, აღიარებენ რა, აშშ-ისა და ევროკავშირის „უდიდეს დამსახურებას“ საქართველოს სახელმწიფოებრიობის შენარჩუნებაში, დეპუტატები აღნიშნავენ, რომ „განსაკუთრებით საგანგაშოა“, რომ აშშ-ისა და ევროკავშირის ელჩების მიმართ „ცილისმწამებლურ თავდასხმებში“, თითქოს ისინი საქართველოს ომში ჩართვას ცდილობენ, მმართველი გუნდის წარმომადგენლებთან ერთად, „სასამართლო კორპუსის გარკვეული წარმომადგენლებიც არიან ჩართულნი“.

„მიუხედავად ზემოხსენებული ელჩების არაერთი საჯარო განცხადებისა, რომ შეერთებულ შტატებს და ევროკავშირს არ სურთ და არც არასდროს სურვებიათ რუსეთის წინააღმდეგ საქართველოს ომში ჩართვა და რომ ამგვარი გამონათქვამები სიმართლეს არ შეესაბამება, ქართული ოცნება მაინც ჯიუტად აგრძელებს სიცრუის ტირაჟირებას“, – ხაზს უსვამენ ოპოზიციონერი დეპუტატები.

ამ კონტექსტში, ისინი ქართული ოცნების დამფუძნებლის, ბიძინა ივანიშვილის მიერ 27 ივლისს გამოქვეყნებულ წერილსაც იხსენებენ, სადაც მან აშშ-ის ელჩთან შეხვედრა დაადასტურა და ხაზს უსვამენ, რომ ივანიშვილი არაფერს ამბობს მათ შორის გამართული საუბრის შინაარსზე.

„[ამით ივანიშვილი] შეფარვით ამყარებს „ქართული ოცნების“ ზემოხსენებულ მესიჯს, თითქოს დასავლეთს საქართველოს „ომში ჩათრევა“ სურს. აღნიშნული მიუთითებს ბიძინა ივანიშვილის კავშირზე „ქართული ოცნების“ ამ ანტისახელმწიფოებრივ კამპანიასთან“, – აცხადებენ დეპუტატები.

ოპოზიციონერი დეპუტატები მიიჩნევენ, რომ მმართველი ძალის ამგვარი ქმედების მიზანი საქართველოს ევროკავშირსა და ნატოში ინტეგრაციის პროცესის ხელშეშლაა, მაშინ როდესაც საქართველოს კონსტიტუციის *78-ე მუხლის თანახმად, ამის უზრუნველყოფა „საქართველოს კონსტიტუციური ორგანოების და ე.ი. ქართული ოცნების ხელისუფლების ვალდებულებას წარმოადგენს“.

„მივმართავთ ქართული ოცნებას, დაუყოვნებლივ შეწყვიტოს საქართველოს სტრატეგიული პარტნიორების – შეერთებული შტატებისა და ევროკავშირის წინააღმდეგ წარმოებული, ზემოხსენებული ცილისმწამებლური და დეზინფორმაციული კამპანია“, – ხაზს უსვამენ ოპოზიციონერი დეპუტატები.

*საქართველოს კონსტიტუცია, მუხლი78: ევროპულ და ევროატლანტიკურ სტრუქტურებში ინტეგრაცია – კონსტიტუციურმა ორგანოებმა თავიანთი უფლებამოსილების ფარგლებში მიიღონ ყველა ზომა ევროპის კავშირსა და ჩრდილოატლანტიკური ხელშეკრულების ორგანიზაციაში საქართველოს სრული ინტეგრაციის უზრუნველსაყოფად.

This post is also available in: English (ინგლისური) Русский (რუსული)

Back to top button