ახალი ამბები

ბორელი ღარიბაშვილთან საარჩევნო და სასამართლო რეფორმებზე საუბრობს

საქართველომ „წინ უნდა წაწიოს მნიშვნელოვანი რეფორმების დღის წესრიგი, რომელიც საარჩევნო და სასამართლო სისტემებსაც უნდა მოიცავდეს“, – განაცხადა ჟუზებ ბორელმა, ევროკავშირის მთავარმა დიპლომატმა ირაკლი ღარიბაშვილთან ერთად დღეს ბრიუსელში, საქართველო-ევროკავშირის ასოცირების საბჭოს სხდომის დასრულების შემდეგ გამართულ ბრიფინგზე.

„დამოუკიდებელი და ანგარიშვალდებული სასამართლო სისტემა არა მხოლოდ ხელს უწყობს ძლიერ დემოკრატიას, არამედ ინვესტორებსაც იზიდავს, რასაც შედეგად ეკონომიკური ზრდა მოყვება“, – განაცხადა ბორელმა და დასძინა, რომ „საზოგადოების ნდობის მოპოვების მიზნით, საქართველომ უნდა შეასრულოს მართლმსაჯულების რეფორმის კუთხით აღებული ვალდებულებები, მათ შორის, განახორციელოს უზენაესი სასამართლოს მოსამართლეთა შერჩევის პროცესის რეფორმა“.

ბრიფინგს წინ უძღოდა ევროკავშირი-საქართველოს ასოცირების საბჭოს მე-6 შეხვედრა გაიმართა, სადაც საქართველოში არსებული პოლიტიკური კრიზისი, საარჩევნო და სასამართლო სისტემების რეფორმა, კოვიდ-19-ის პანდემიის შემდგომი ეკონომიკური გაჯანსაღება, ასევე რუსეთის მიერ ოკუპირებული რეგიონებისა და კავკასიის რეგიონში სტაბილურობის საკითხები განიხილეს. შეხვედრა საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის, ჟუზებ ბორელის თავმჯდომარეობით გაიმართა, საქართველოს დელეგაციას კი – პრემიერ-მინისტრი ირაკლი ღარიბაშვილი ხელმძღვანელობდა. სხდომას ესწრებოდა ოლივერ ვარჰეიც, ევროკომისარი სამეზობლოსა და გაფართოების საკითხებში. 

პრესკონფერენციაზე ჟუზებ ბორელმა თქვა, რომ ასოცირების საბჭოს წლევანდელი შეხვედრა საქართველოსთვის „მნიშვნელოვან მომენტში“, ოქტომბრის საპარლამენტო არჩევნების შემდგომი მოვლენების ფონზე იმართება და რომ არსებული პოლიტიკური სიტუაციიდან გამოსასვლელად ყველა პოლიტიკურმა აქტორმა საერთო ენა უნდა გამონახოს“.

დიპლომატი საქართველოს პოლიტიკური კრიზისში ევროკავშირის მედიაციის საკითხსაც შეეხო. ბორელის თქმით, პრემიერ-მინისტრი ღარიბაშვილი „მზადაა კონსტრუქციული თანამშრომლობისა და პროგრესისთვის და იგივე უნდა გააკეთოს ოპოზიციამაც“.

„ნება მომეცით, პრემიერ-მინისტრის თანდასწრებით ხაზი გავუსვა, რომ განსაკუთრებული პასუხისმგებლობა გამოსავლის მოძებნაში მმართველ პარტიას და ხელისუფლებას აკისრია“, – განაცხადა ბორელმა და ამასთან, ოპოზიციის გასაგონადაც დასძინა, რომ საპარლამენტო ბოიკოტი დემოკრატიასა და პოლიტიკურ პლურალიზმს ხელს არ უწყობს.

თავის მხრივ, პრემიერ-მინისტრმა ირაკლი ღარიბაშვილმა კიდევ ერთხელ გაიმეორა „საქართველოს მზადყოფნა, რომ შეუერთდეს ევროკავშირს, როგორც ძლიერი, სანდო და დემოკრატიული პარტნიორი“. „საქართველო დემოკრატიის მნიშვნელოვან პლატფორმას წარმოადგენს არასტაბილურ გეოპოლიტიკურ რეგიონში“, – განაცხადა მან.

პრემიერ-მინისტრ ღარიბაშვილის თქმით, საქართველო მზად არის რეფორმების „რთული, თუმცა მნიშვნელოვანი გზა“ გაიაროს. მან აღნიშნა, რომ მთავრობის დაპირება, 2024 წლისთვის ევროკავშირის სრულუფლებიან წევრობა მოითხოვოს, „ძლიერი მოტივაციაა ჩვენთვის, ყველა საჭირო პოლიტიკური და ეკონომიკური რეფორმა განვახორციელოთ“. პრემიერმა ასევე თქვა, რომ ევროპული საბჭოს პრეზიდენტის, შარლ მიშელის ორი კვირის წინანდელი სტუმრობა თბილისში „ევროკავშირის საქართველოსადმი ერთგულების მკაფიო ნიშანია“.

მისივე თქმით, საქართველოს „ეტაპობრივი და სრული ინტეგრაცია ევროკავშირის ერთიან ბაზარზე შემდგომი მნიშვნელოვანი ეტაპი იქნება“ ევროკავშირთან მჭიდრო კავშირების დამყარების საქმეში. „საქართველო ევროკავშირისთვის კარიბჭეა აზიისკენ. ჩვენ შეგვიძლია მნიშვნელოვანი როლი ვითამაშოთ, როგორც ევროპის ალტერნატიულმა სატრანსპორტო კვანძმა და ენერგომარშრუტმა“, – აღნიშნა პრემიერ-მინისტრმა.

ღარიბაშვილის თქმით, ასოცირების საბჭოს შეხვედრაზე მან „რუსეთ-საქართველოს კონფლიქტის მშვიდობიანი მოგვარების“ საკითხიც განიხილა. ღარიბაშვილმა ხაზი გაუსვა ევროკავშირის სადამკვირვებლო მისიისა და ჟენევის დისკუსიებში ორგანიზაციის ჩართულობის „სასიცოცხლო მნიშვნელობასაც“.

ბრიფინგზე სამეზობლო პოლიტიკისა და გაფართოების საკითხებში ევროკომისარმა ოლივერ ვარჰეიმაც ისაუბრა. „თანაბრად მნიშვნელოვანია, რომ საქართველომ რეფორმების ტემპი შეინარჩუნოს და ევროკავშირის სტანდარტებთან და რეგულაციებთან დაახლოება განაგრძოს“, თქვა ვაეჰეიმ. იგი მიესალმა სახელმწიფო შესყიდვებისა და შრომის კანონმდებლობის დარგში ქვეყნის მიღწეულ პროგრესს, თუმცა ქვეყანას სასამართლოს სისტემისა და კანონის უზენაესობის შემდგომი რეფორმების გატარებისაკენაც მოუწოდა.

საქართველოში არსებულ პოლიტიკურ კრიზისზე საუბრისას, ევროკომისარმა მხარეებს კონსტრუქციული დიალოგისაკენ მოუწოდა, რაც მისი თქმით, ქვეყანას უნდა დაეხმაროს ისეთი გამოსავალი გამოძებნოს, რომელიც კონსტიტუციის და დემოკრატიული პრინციპების შესაბამისი იქნება.

„ევროკავშირი საქართველოს უმსხვილესი სავაჭრო პარტნიორია და ჩვენ ამას უნდა დავეფუძნოთ“, – განაცხადა ვარჰეიმ და აღნიშნა, რომ ევროკავშირი მზად არის ევროპაში საქართველოს ექსპორტის დივერსიფიკაცია მოახდინოს. „ჩვენ უფრო დიდი და უფრო ხელმისაწვდომი ხიდები უნდა ავაშენოთ საქართველოს და ევროპას შორის, განსაკუთრებით როცა საქმე შავ ზღვაზე, როგორც სავაჭრო მარშრუტზე, წვდომას ეხება“, დასძინა მან.

ასოცირების საბჭოს შეხვედრამდე პრემიერ-მინისტრმა ირაკლი ღარიბაშვილმა ბორელთან და ვარჰეისთან ინდივიდუალური შეხვედრები გამართა, სადაც სხვა საკითხებთან ერთად საქართველოს პოლიტიკურ კრიზისზე, რუსულ ოკუპაციასა და კოვიდ-19-თან დაკავშირებულ გამოწვევებზე ისაუბრა.

ასევე წაიკითხეთ: 

This post is also available in: English (ინგლისური) Русский (რუსული)

Back to top button