ახალი ამბები

ლევან ხაბეიშვილის ფიზიკური შეურაცხყოფისთვის ბრალი საკრებულოს ოცნების სამ დეპუტატს წარედგინა

Tags

გენერალურმა პროკურატურამ ნაციონალური მოძრაობის საკრებულოს დეპუტატის ლევან ხაბეიშვილის მიმართ 24 იანვარს განხორციელებული ჯგუფური ძალადობის ფაქტზე, საკრებულოს სამ დეპუტატს ქართული ოცნებიდან – ალექსანდრე ხუჯაძეს, ავთანდილ ცინცაძეს და თარაშ შურღაიას ბრალი წარუდგინა.

სისხლის სამართლის კოდექსის მიხედვით, აღნიშნული ბრალისთვის (126-ე მუხლის 11 ნაწილის „ბ“ ქვეპუნქტი) პირი ისჯება ჯარიმით ან საზოგადოებისათვის სასარგებლო შრომით ვადით 180-დან 240 საათამდე ან თავისუფლების აღკვეთით ვადით ორ წლამდე.

პროკურატურის 31 იანვრის განცხადებაში ასევე ნათქვამია, რომ 24 იანვარს მომხდარი ინციდენტის შემდეგ, საკრებულოს ფოიეში ხაბეიშვილის მიერ ქართული ოცნების დეპუტატის ირაკლი ზარქუას მიმართ განხორციელებული ძალადობის ფაქტზე საპროცესო მოქმედებების ჩატარების მიზნით, საგამოძიებო ორგანოში თავად ლევან ხაბეიშვილიც არის დაბარებული.

საკრებულოს იურიდიულ საკითხთა და ადამიანის უფლებათა დაცვის კომისიის თავმჯდომარის ლევან ჟორჟოლიანის განმარტებით, ბრალის წარდგენის მიუხედავად, საკრებულოს წევრები საკუთარი უფლებამოსილების შესრულებას გააგრძელებენ.

„სამართლებრივად, ადგილობრივი თვითმმართველობის კოდექსისა და საკრებულოს რეგლამენტის შესაბამისად, სისხლის სამართლის პროცესში საკრებულოს წევრის უფლებამოსილება ჩერდება მხოლოდ და მხოლოდ იმ შემთხვევაში, თუ აღმკვეთის სახით გამოყენებული იქნება პატიმრობა, სხვა შემთხვევაში, საკრებულოს წევრის უფლებამოსილება არ ჩერდება“, – განაცხადა ჟორჟორლიანმა.

ინციდენტი საკრებულოში 24 იანვარს, სპორტისა და ახალგაზრდულ საქმეთა, განათლებისა და კულტურის და სარევიზიო კომისიების გაერთიანებულ სხდომაზე მოხდა. ქართული ოცნების წევრებმა ლევან ხაბეიშვილთან შელაპარაკების შემდეგ, მას ფიზიკური შეურაცხყოფა მიაყენეს, რა დროსაც ხაბეიშვილმა სახის არეში დაზიანება მიიღო.

ინციდენტი აქ არ ამოწურულა. კომიტეტის სხდომათა დარბაზიდან გამოსული ლევან ხაბეიშვილი ფოიეში მყოფ მმართველი გუნდის წევრს, საკრებულოს თავმჯდომარის მოადგილეს ირაკლი ზარქუას დაუპირისპირდა. ფაქტზე შინაგან საქმეთა სამინისტრომ გამოძიება მხოლოდ რამდენიმე დღის შემდეგ დაიწყო.

ალექსანდრე ხუჯაძე, ავთანდილ ცინცაძე, თარაშ შურღაია და ლევან ხაბეიშვილი საკრებულოს წევრები 2017 წლის თვითმმართველობის არჩევნების შემდეგ არიან.

This post is also available in: English (ინგლისური) Русский (რუსული)

მსგავსი/Related

Back to top button