ყოფილ შს მინისტრს და გენერალურ პროკურორს ბრალი წაუყენეს
საქართველოს გენერალურმა პროკურატურამ დღეს განაცხადა, რომ, 2004 წელს მომხდარი ამირან (ბუტა) რობაქიძის მკვლელობის საქმესთან დაკავშირებით, მაშინდელ შინაგან საქმეთა მინისტრს ირაკლი ოქრუაშვილს და გენერალურ პროკურორს ზურაბ ადეიშვილს ბრალი წაუყენეს სამსახურებრივი უფლებამოსილების ბოროტად გამოყენებისათვის, რაც სასჯელის სახედ სამიდან რვა წლამდე ვადით თავისუფლების აღკვეთას ითვალისწინებს.
ყოფილი გენერალური პროკურორი ზურაბ ადეიშვილი კი, რომელმაც 2012 წლის ბოლოს, ხელისუფლებაში ქართული ოცნების შემდეგ, საქართველო დატოვა, უნგერთში ცხოვრობს, სადაც თავშესაფარი მიიღო. საქართველოს ხელისუფლებას 2013 წლიდან მასზე, არაერთი ბრალდებით, ძებნა ჰქონდა გამოცხადებული, თუმცა ამ დრომდე მის ექსტრადირებას ვერ მიაღწია.
საქართველოს გენერალური პროკურატურის მიერ დღეს გავრცელებული განცხადების თანახმად, ირაკლი ოქრუაშვილმა, მას შემდეგ, რაც შეიტყო, რომ პატრულ-ინსპექტორმა ერთ-ერთი ავტომობილის შემოწმებისას შემთხვევითი გასროლით მოკლა მოქალაქე ბუტა რობაქიძე, „შს სამინისტროს მაღალჩინოსნებს დავალება მისცა, გადაერჩინათ საპატრულო პოლიციის იმიჯი და აღნიშნული ფაქტისთვის მიეცათ შეიარაღებულ დაჯგუფების მიერ პოლიციელებზე თავდასხმის სახე“.
უწყების განცხადებით, ოქრუაშვილის დავალების შესაბამისად, „შს სამინისტროს მაღალჩინოსნებმა გარდაცვლილ ამირან (ბუტა) რობაქიძეს და მასთან ერთად მანქანაში მსხდომ პირებს ჩაუდეს ცეცხლსასროლი იარაღები და საბრძოლო მასალა, რის შემდეგაც საქართველოს იმჟამინდელი გენერალური პროკურორის ზურაბ ადეიშვილის დავალებით, გამოძიება წარიმართა სამართლებრივად არასწორი მიმართულებით, რაც გამოიხატა გაყალბებული მტკიცებულებების საპროცესო წესით დამაგრებასა და შს სამინისტროს მაღალჩინოსნების მიერ შემუშავებული ვერსიის გამყარებაში“.
მოძრაობა „გამარჯვებული საქართველოს“ წევრები, რომლებიც ირაკლი ოქრუაშვილს პოლიტიკურ პატიმრად მიიჩნევენ, მისთვის ახალი ბრალის წარდგენას ქართული ოცნების თავმჯდომარეს ბიძინა ივანიშვილს უკავშირებენ. მათი თქმით, ივანიშვილს ოქრუაშვილის გათავისუფლების „ეშინია“, ახალი ბრალის წარდგენა კი, ოქრუაშვილისთვის პატიმრობის გახანგრძლივებას ემსახურება.
ასევე წაიკითხეთ:
This post is also available in: English (ინგლისური) Русский (რუსული)
