„ქართულმა ოცნებამ“ ოქტომბრის არჩევნებისთვის დეპუტატობის კანდიდატთა სრული სია წარმოადგინა
მმართველმა პარტიამ „ქართულმა ოცნებამ“ ოქტომბრის არჩევნებისთვის 170 დეპუტატობის კანდიდატთა სრული სია წარმოადგინა, თუმცა საქართველოს პარლამენტს 150 წევრი ყავს.
საპარლამენტო უმრავლესობის ლიდერმა მამუკა მდინარაძემ ჟურნალისტებს განუმარტა, რომ მმართველ პარტიას საკონსტიტუციო უმრავლესობის მოპოვების „ობიექტური მოლოდინი“ აქვს.
„ქართულმა ოცნებამ“ სიის პირველი ოცეული ორი კვირის წინ დაასახელა. 2012 წლიდან პირველად, სიის პირველი ნომერი მმართველი პარტიის დამფუძნებელი და საპატიო თავმჯდომარე, ბიძინა ივანიშვილია.
სრულ სიაში არ შედიან „ქართული ოცნების“ რამდენიმე ცნობილი სახე, მათ შორის არჩილ თალაკვაძე, პარლამენტის ყოფილი თავმჯდომარე, რომელიც 2020 წლის სიაში მეორე იყო; ფეხბურთის ეროვნული ფედერაციის ხელმძღვანელი ლევან კობიაშვილი; ცნობილი პიანისტი ელისო ბოლქვაძე; და ბექა ოდიშარია, რომელიც ოპოზიციონერი ქალი დეპუტატების მიმართ უხამსი გამონათქვამებითაა ცნობილი.
მდინარაძემ განაცხადა, რომ თალაკვაძესთან კონსულტაციები მიმდინარეობს ძალიან სერიოზულ საკითხზე, რაც მან არ გაამხილა. მისი თქმით, „ქართული ოცნების“ რამდენიმე წევრი მთავრობისთვის განიხილება და თალაკვაძე შესაძლოა ერთ-ერთი მათგანი იყოს.
„ქართული ოცნების“ რამდენიმე მოქმედი დეპუტატი სიის ტოპ 50-ში ვერ მოხვდა. მათ შორისაა პარლამენტის თავმჯდომარის მოადგილე ნინო წილოსანი, რომელიც ამჟამად 61-ე ადგილზეა; ანტიდასავლური განცხადებებით ცნობილი ირაკლი ზარქუა 72-ე, ხოლო მარიამ ლაშხი, რომელმაც ადრე „გლობალური ომის პარტია“ მასონებს შეადარა, 59-ე ადგილზეა; ალუდა ღუდუშაური 70-ე, გივი მიქანაძე 73-ე, ხოლო ვიქტორ ჯაფარიძე 55-ე ნორმებით არიან წარმოდგენილნი.
„ქართული ოცნების“ სიაში ასევე წარმოდგენილი არიან „ხალხის ძალის“ წევრები, მათ შორის დეპუტატი სოზარ სუბარი სიაში მე-11 ნომრით, ხოლო ვიქტორ ჯაფარიძე 55-ე ნომრით არიან წარმოდგენილნი.
26 სექტემბერს პარტიების მიერ კანდიდატთა სიების წარდგენის ვადა ამოიწურა. 26 ოქტომბერს საქართველოში პირველი სრულად პროპორციული საპარლამენტო არჩევნები ჩატარდება.
ასევე წაიკითხეთ:
- 26/09/2024 – კოალიციამ „ძლიერი საქართველო“ საარჩევნო სიის ნაწილი წარმოადგინა
- 25/09/2024 – გახარიას პარტიამ „საქართველოსთვის“ ოქტომბრის არჩევნებისთვის დეპუტატობის კანდიდატები დაასახელა
This post is also available in: English (ინგლისური) Русский (რუსული)