საქართველო ავღანური არმიის გადამზადებისთვის 20 ინსტრუქტორის გაგზავნას აპირებს

საქართველო, რომლის კონტინგენტის რაოდენობა ავღანეთში 950–ს აღწევს, გამოდის ინიციატივით, რომ 20 ინსტრუქტორი გააგზავნოს ავღანეთის შეიარაღებული ძალების გადამზადების მიზნით, განაცხადა საქართველოს თავდაცვის სამინისტრომ.   

სამინისტროს ინფორმაციით, პრეზიდენტმა სააკაშვილმა, რომელიც ლისაბონის სამიტის ფარგლებში ISAF-ის პროგრამაში ჩართული ქვეყნების ლიდერების შეხვედრას დაესწრო, ეს შეთავაზება შეხვედრის მონაწილეებს გააცნო.

"მნიშვნელოვანია სწორედ ის შეთავაზება რაც დღეს გაკეთდა,“ – განაცხადა თავდაცვის მინისტრმა ბაჩო ახალაიამ, "ჩვენი შეთავაზება გულისხმობს სწორედ ქართველ სამხედრო ინსტრუქტორებს, რომლებიც წავლენ როგორც ინსტრუქტორები, გაწვრთიან ცალკეული პროფესიების მიხედვით ავღანელ სამხედროებს, შეიძლება იყოს სახმელეთო კომპონენტი, შეიძლება იყოს საავიაციოც“.

This post is also available in: English (ინგლისური) Русский (რუსული)