ეგზით პოლებით უგულავა დიდი უპირატესობით ლიდერობს

ადგილობრივ არჩევნებზე ჩატარებული ეგზით პოლების მონაცემებით დიდი უპირატესობით ლიდერობს მოქმედი მერი გიგი უგულავა და მმართველი ნაციონალური მოძრაობა.

”რუსთავი 2”-სა და ”იმედის” მიერ დაკვეთილი ეგზით პოლების საბოლოო მონაცემების თანახმად, რომელიც ამერიკულმა კომპანიამ Edison Research-მა განახორციელა, ხმათა 60% მიიღო გიგი უგულავამ; მას მოსდევს 17%-ით ირაკლი ალასანია, ალიანსი საქართველოსთვის ლიდერი; გიორგი ჭანტურია, ქრისტიან-დემოკრატების ლიდერი ხმათა 10%-ით; ეროვნული საბჭოს კანდიდატი ზვიად ძიძიგური  – 6%-ით; მრეწველთა ლიდერი გოგი თოფაძე – 5%; დანარჩენ კანდიდატებს ხმათა 1% აქვთ.

”რუსთავი 2”-ის და ”იმედის” დაკვეთით Edison Research-ის მიერ განხორციელებული ეგზით პოლების შედეგები ეფუძნება თბილისში მდებარე 72 საარჩევნო უბანზე შემთხვევითი შერჩევის პრინციპით შერჩეული 12 951 ამომრჩევლის გამოკითხვას. მათგან გამოკითხვაში მონაწილეობის მიღებაზე თანხმობა 49%-მა განაცხადა.

რაც შეეხება თბილისის საკრებულოში პარტიების პროპორციულ მონაცემებს, ნაციონალურ მოძრაობას ეგზით პოლებით აქვს 59%, ალიანსი საქართველოსთვის – 17%; ქრისტიან-დემოკრატები – 10%;  ეროვნული საბჭო – 7%; მრეწველები – 5%.

ცდომილება კომპანიის განცხადებით 2%-ია. 

საზოგადოებრივი მაუწყებლის დაკვეთით ნიუმბერგში განთავსებული GfK Group-ის მიერ ჩატარებული ეგზით პოლების წინასწარი მონაცემების თანახმად მერობის კანდიდატებზე ხმები ასე გადანაწილდა: გიგი უგულავა – 60%; ირაკლი ალასანია – 18%; გიორგი ჭანტურია – 7%; ზვიად ძიძიგური – 7%; გოგი თოფაძე – 4%. 

This post is also available in: English (ინგლისური) Русский (რუსული)