აშშ-საქართველოს სტრატეგიული პარტნიორობის ქარტიას 9 იანვარს მოეწერება ხელი
აშშ და საქართველო სტრატეგიული პარტნიორობის ქარტიას 9 იანვარს მოაწერენ ხელს, განაცხადეს საქართველოს საგარეო უწყებაში.
ამ მიზნით საგარეო საქმეთა მინისტრი გრიგოლ ვაშაძე აშშ-ში 8 იანვარს გაემგზავრება.
დოკუმენტზე, რომელიც ორ სახელმწიფოს შორის პარტნიორობის გაღრმავებასა და თანამშრომლობის გაფართოებას ითვალისწინებს თავდაცვის, უსაფრთხოების, ეკონომიკის, ენერგეტიკის, დემოკრატიული რეფორმების, დიპლომატიისა და კულტურის სფეროებში, ხელმოწერა 4 იანვარს იყო დაგეგმილი, თუმცა ახლო აღმოსავლეთში განვითარებულ მოვლენებთან დაკავშირებით აშშ-ს სახელმწიფო მდივნის კონდოლიზა რაისის სამუშაო გრაფიკის შეცვლის გამო ეს ღონისძიება გადაიდო.
აშშ–ის სახელმწიფო დეპარტამენტის განცხადებით, ხელშეკრულება იმ ქარტიის მსგავსი იქნება, რომელიც ვაშინგტონმა დეკემბერში კიევთან გააფორმა.
This post is also available in: English (ინგლისური) Русский (რუსული)