ოპოზიციის საპროტესტო აქცია განახლდა

”იმედი” საპროტესტო აქციას პირდაპირ ეთერში გადასცემს.

ოპოზიციის ზოგიერთი ლიდერი უფრო რადიკალური გახდა თავის მოთხოვნებში, ხოლო აქციის მონაწილენი პრეზიდენტის მისამართით სკანდირებენ ”წადი, წადი”.

”მე ვეუბნებოდი ასლან აბაშიძეს ჩამოგდებამდე: ნუ გახდები იძულებული, რომ დადგე არჩევანის წინაშე მილოშევიჩსა და ჩაუშესკუს შორის. ახლა, იგივეს ვეუბნები სააკაშვილს:ნუ გახდები იძულებული, რომ დადგე ამ არჩევანის წინაშე; შენ კიდევ გაქვს დრო, რომ გააკეთო არჩევანი არჩევნების სასარგებლოდ. ნუ გახდები შენი გარემოცვის მძევალი, რომელთაც უკან დასახევი გზა არ აქვთ,” – განაცხადა დეპუტატმა დავით ბერძენიშვილმა რესპუბლიკური პარტიიდან აქციაზე.

”მას ეშინია. მას ვითომ არ შეეშინდა განმუხურში წასვლა და რუს ჯარისკაცებთან დაპირისპირება . მაგრამ, მას ეშინია მოვიდეს აქ და თვალებში შემოგხედოთ,” – მიმართა მომიტინგეებს დეპუტატმა ზვიად ძიძიგურმა, კონსერვატიული პარტიის ლიდერმა.

”ყველაფერი ჩვენ გამძლეობაზეა დამოკიდებული,” – განუცხადა დეპუტატმა კახა კუკავამ კონსერვატიული პარტიიდან საპროტესტო აქციის მონაწილეებს. ”მათ [ხელისუფლებას] ჰგონიათ, რომ ჩვენ დავიშლებით სიცივის გამო, მაგრამ ეს არ მოხდება. არც ერთი ნაბიჯი უკან”.

ამავდროულად, ხელისუფლება საღამოს ლოკომოტივის სტადიონზე საესტრადო კონცერტის გამართვას გეგმავს. ოპოზიციის განცხადებით, ხელისუფლება ხალხის გადაბირებას ცდილობს.

2 ნოემბერს პარლამენტის წინ ათიათასობით ადამიანი შეიკრიბა. ოფიციალური პირების განცხადებით, აქციაში მხოლოდ 25 000-მა ადამიანმა მიიღო მონაწილეობა. ოპოზიციის ლიდერთა განცხადებით, 2 ნოემბერს პარლამენტის წინ 100 000-ზე მეტი ადამიანი შეიკრიბა; სხვა მონაცემებით, ეს მაჩვენებელი 50 000-დან 70 000-მდე მერყეობდა.

This post is also available in: English (ინგლისური) Русский (რუსული)