თურქეთი იმედოვნებს, რომ “გაზპრომთან” დადებული გარიგება შაჰ-დენიზის პროექტზე არ იმოქმედებს

(თბილისი, 16 სექტემბერი, 2003, სივილ ჯორჯია) – თურქეთის საგარეო საქმეთა მინისტრმა აბდულა გიულიმ, რომელიც ორდღიანი ვიზიტით საქართველოში 15 სექტემბერს ჩამოვიდა, იმედი გამოთქვა, რომ საქართველოსა და რუსულ ენერგოკომპანია “გაზპრომს” შორის დადებული ხელშეკრულება არ შეაფერხებს შაჰ-დენიზის პროექტის განხორციელებას, რომლის საშუალებითაც მოხდება აზერბაიჯანული გაზის თურქეთში ტრანსპორტირება საქართველოს გავლით.

“ვიმედოვნებ, “გაზპრომთან” დადებული გარიგების მიუხედავად, საქართველო და თურქეთი შეასრულებენ თავიანთ ვალდებულებებს პროექტთან დაკავშირებით”, – განაცხადა თურქეთის მინისტრმა 15 სექტემბერს თავის ქართველ კოლეგასთან, ირაკლი მენაღარიშვილთან, ერთად გამართულ ბრიფინგზე.

საქართველომ “გაზპრომთან” ხელშეკრულებას ივლისში მოაწერა ხელი. ხელშეკრულების თანახმად, რუსული კომპანია განაახლებს და შემდგომში გააკონტროლებს საქართველოს გაზსადენის სისტემას.

This post is also available in: English (ინგლისური) Русский (რუსული)