სსო-ები: ქართული ოცნება „მშვიდობიანი პროტესტის აკრძალვის“ მიზნით კანონებს ამკაცრებს

დაახლოებით 30-მა სამოქალაქო საზოგადოების ორგანიზაციამ დაგმო „ქართული ოცნების“ ბოლო საკანონმდებლო წინადადება პროტესტთან დაკავშირებული დანაშაულისთვის სასჯელის გამკაცრების შესახებ და მას „მშვიდობიანი პროტესტის აკრძალვის მცდელობა“ და „ქვეყანაში დემოკრატიული ინსტიტუტების დემონტაჟისკენ“ გადადგმული კიდევ ერთი ნაბიჯი უწოდა.

„ქართულმა ოცნებამ“ 13 ოქტომბერს განაცხადა, რომ მომიტინგეების წინააღმდეგ უფრო მკაცრ ადმინისტრაციულ და სისხლისსამართლებრივ ზომებს შემოიღებს ისეთი ქმედებებისთვის, როგორიცაა სახის დაფარვა აქციების დროს, გზების გადაკეტვა და იმ შეკრებებში მონაწილეობა, რომელთა შეწყვეტაც ოფიციალურმა პირებმა მოითხოვეს.

„ხელისუფლება ამ ცვლილებებით ყველას უგზავნის ერთსა და იმავე მუქარას: თუ ხმას ამოიღებ — დაგაპატიმრებ“, – განაცხადა 25-მა სსო-მ 14 ოქტომბერს გავრცელებულ ერთობლივ განცხადებაში.

„ამ ცვლილებებით, ხელისუფლება ცდილობს აკრძალოს პროტესტის ნებისმიერი ფორმა“, – ნათქვამია განცხადებაში. „ასეთი კანონმდებლობა უცხოა დემოკრატიული სამყაროსათვის და პირდაპირ წინააღმდეგობაში მოდის საქართველოს კონსტიტუციასთან და ადამიანის უფლებათა და ძირითად თავისუფლებათა დაცვის ევროპულ კონვენციასთან“.

„ეს ინიციატივა არ ეხება მხოლოდ პოლიტიკურად აქტიურ ჯგუფებს — ის შეეხება საქართველოს თითოეულ მოქალაქეს, რომელიც საჯაროდ მოითხოვს სამართლიანობას, აღშფოთდება კორუფციით, გააპროტესტებს უკანონო დაკავებას ან უსამართლო განაჩენა, მოუწესრიგებელ ინფრასტრუქტურასა თუ შემწეობის სიმცირეს, შეეცდება დაიცავს ქალები ან ბავშვები ძალადობისგან, ხმას აიმაღლება გარემოს დასაცავად და ა.შ.“, – აცხადებენ ორგანიზაციები.

This post is also available in: English