„რეპორტიორები საზღვრებს გარეშე“ აჭარის ტელევიზიაში მიმდინარე მოვლენების გამო შეშფოთებას გამოხატავს

მედიის უფლებათა დამცველმა საერთაშორისო ორგანიზაციამ „რეპორტიორები საზღვრებს გარეშე“ (Reporters Sans Frontières – RSF) ევროპის საბჭოს მედია პლატფორმაზე აჭარის მაუწყებლის შესახებ განგაშის შეტყობინება გამოაქვეყნა, რომელშიც ჟურნალისტების დაცვისა და მათი უსაფრთხოების უზრუნველყოფის ხელშეწყობის მნიშვნელობაზეა საუბარი.

5 მარტს გავრცელებული ინფორმაციით, რომლის სათაურიცაა – „აჭარის ტელევიზიაში რამდენიმე ჟურნალისტი პოლიტიკური ზეწოლის შედეგად გაათავისუფლეს“, – RSF-მა განაცხადა, რომ შეშფოთებულია საქართველოში მედიაზე მზარდი კონტროლის გამო. ორგანიზაციამ ხელისუფლებას მოუწოდა, პატივი სცეს ტელეკომპანიის საინფორმაციო სამსახურის სარედაქციო დამოუკიდებლობას.

განგაშის შეტყობინების თანახმად, „2020 წლის 28 თებერვალს შორენა ღლონტი ტელეკომპანია აჭარის საინფორმაციო სამსახურის ხელმძღვანელის თანამდებობიდან გაათავისუფლეს. 19 თებერვალს თანამდებობიდან გაათავისუფლეს მისი მოადგილე მაია მერკვილაძეც. ორივე მათგანი დამოუკიდებელი სარედაქციო პოლიტიკის შენარჩუნებაში მთავარს როლს ასრულებდა“. ამავე ინფორმაციის მიხედვით, „2 თებერვალს ტელეკომპანიის დირექტორის ყოფილმა მოადგილემ, ნათია ზოიძემ განმარტა, რომ მას პოლიტიკური ზეწოლის გამო თანამდებობის დატოვება მოუხდა“.

RSF-მა აღნიშნა, რომ ტელეკომპანიის „ჟურნალისტებმა რამდენიმე საპროტესტო აქცია მას შემდეგ გამართეს, რაც მრჩეველთა საბჭომ, სადაც 4-დან 3 წევრი ქართული ოცნების კვოტითაა არჩეული, 2019 წლის 22 ნოემბერს მაუწყებლის ახალ დირექტორად გიორგი კოხრეიძე აირჩია“.

მედიის უფლებათა დამცველმა ორგანიზაციამ ხაზი გაუსვა, რომ „თანამშრომლები ტელეკომპანიის სარედაქციო პოლიტიკის შეცვლისკენ მიმართულ გამუდმებულ ძალისხმევას გმობენ“.

„ზოგიერთმა მათგანმა ცოტა ხნის წინ „ალტერნატიული“ პროფკავშირი ჩამოაყალიბა, რომელიც, იმ შემთხვევაში, თუკი სახელმწიფოს ჩარევის დასასრულებად მოლაპარაკებები წარუმატებელი აღმოჩნდება, საკუთარი სარედაქციო დამოუკიდებლობის დასაცავად გაფიცვას გეგმას“, – წერს მედიის უფლებათა დამცველი ორგანიზაცია.

ასევე წაიკითხეთ:

• „აჭარის მაუწყებელში სუს-ია“ – ჟურნალისტების მდუმარე პროტესტი
• აჭარის მაუწყებლის თანამშრომლების მხარდასაჭერად პარლამენტის წინ აქცია გაიმართა
• კოალიცია მედიის ადვოკატირებისთვის აჭარის მაუწყებლის თაობაზე საერთაშორისო ორგანიზაციებს მიმართავს
• „რეპორტიორები საზღვრებს გარეშე“ შეშფოთებულია ნათია ზოიძის „ზეწოლის“ გამო გადადგომით
• აჭარის მაუწყებლის ალტერნატიული პროფკავშირი დირექტორის მოადგილის პოსტიდან წასვლას ეხმაურება
• აჭარის მაუწყებლის თანამშრომლები ახალ დირექტორს „შანტაჟში“ ადანაშაულებენ
• აჭარის საზოგადოებრივი მაუწყებლის დირექტორად გიორგი კოხრეიძე აირჩიეს
• აჭარის მაუწყებლის მრჩეველთა საბჭომ ნათია კაპანაძე დირექტორის თანამდებობიდან გადააყენა

This post is also available in: English (ინგლისური) Русский (რუსული)