ახალი ამბები

ჟენევის დისკუსიების თანათავმჯდომარეებმა თბილისში, ცხინვალსა და მოსკოვში შეხვედრები გამართეს

Tags

ჟენევის საერთაშორისო დისკუსიების თანათავმჯდომარეებმა ევროკავშირიდან, გაეროდან და ეუთოდან, ტოივო კლაარმა, ჯიჰან სულთანოღლუმ და რუდოლფ მიხალკამ 6-12 თებერვალს თბილისში, ცხინვალსა და მოსკოვში შეხვედრები გამართეს.

ტოივო კლაარის თქმით, თბილისში მათ „მნიშვნელოვანი დისკუსიები“ ჰქონდათ ცხინვალის რეგიონთან ადმინისტრაციულ სასაზღვრო ზოლზე უსაფრთხოებისა და გამშვები პუნქტების დახურვის თაობაზე.

12 თებერვალს თანათავმჯდომარეები საქართველოს საგარეო საქმეთა სამინისტროს წარმომადგენლებს შეხვდნენ. საქართველოს საგარეო უწყების ინფორმაციით, მინისტრის მოადგილემ ლაშა დარსალიამ შეშფოთება გამოხატა ბოლო პერიოდში საოკუპაციო ხაზის მიმდებარედ „გახშირებულ პროვოკაციებზე, მათ შორის, სოფელ ჩორჩანასთან საოკუპაციო ძალების უკანონო მოქმედებებზე“.

ლაშა დარსალიამ მადლობა გადაუხადა თანათავმჯდომარეებს რუსეთ-საქართველოს კონფლიქტის მშვიდობიანი დარეგულირების პროცესში მათი ძალისხმევისთვის და აღნიშნა, რომ ძალზე მნიშვნელოვანია საქართველოს ოკუპირებულ რეგიონებთან დაკავშირებული საკითხები „მუდმივად იყოს საერთაშორისო თანამეგობრობის დღის წესრიგში“.

მანამდე 10 თებერვალს, საქართველოს სახელმწიფო მინისტრმა შერიგებისა და სამოქალაქო თანასწორობის საკითხებში, ქეთევან ციხელაშვილმა ცალკე შეხვედრები გამართა სულთანოღლუსა და მიხალკასთან.

საქართველში ვიზიტის ფარგლებში, თანათავმჯდომარეები ოკუპირებულ ცხინვალშიც ჩავიდნენ. რეგიონის მედიის ინფორმაციით, ცხინვალის ხელისუფლების წარმომადგენელმა ჟენევის საერთაშორისო დისკუსიებზე, მურატ ჯიოევმა განაცხადა, რომ თბილისის და ცხინვალის პოზიციები ჩორჩანა-წნელისის დაძაბულობის თაობაზე განსხვავდება.

უარყო რა ჰუმანიტარული კრიზისი ახალგორის მუნიციპალიტეტში, ჯიოევმა აღნიშნა, რომ „ქართული პროპაგანდა სრულად განსხვავდება რეალური სიტუაციისგან“ ადგილზე.

გასულ კვირას თანათავმჯდომარეები მოსკოვსაც ესტუმრნენ. მოსკოვის ვიზიტის შესახებ საუბრისას, ევროკავშირის სპეციალურმა წარმომადგენელმა სამხრეთ კავკასიისა და საქართველოში კრიზისის საკითხებში, ტოივო კლაარმა „სამოქალაქო საქართველოს“ 12 თებერვალს განუცხადა, რომ „ჩვენ მკაფიოდ დავაფიქსირეთ რუსეთის წარმომადგენლებთან ჩვენი პოზიცია გამშვებ პუნქტებთან დაკავშირებით“. „მკაფიოდ განვაცხადეთ, რომ რუსი მონაწილეებისგან ველით კონსტრუქტიულ ჩართულობას იმ სიტუაციის მოგვარებაში, რომელშიც ჩვენ ვიმყოფებით“, – განაცხადა კლაარმა.

ჟენევის დისკუსიები, რომელსაც საფუძველი 11 წლის წინ, 2008 წლის აგვისტოს ომის შემდეგ ჩაეყარა, ევროკავშირის, გაეროსა და ეუთოს თანათავმჯდომარეობით იმართება და მასში საქართველოს, რუსეთისა და ამერიკის შეერთებული შტატების, ასევე ოკუპირებული ცხინვალისა და სოხუმის წარმომადგენლები მონაწილეობენ. სხდომები ორი სამუშაო ჯგუფის ფარგლებში მიმდინარებს, რომელთაგანაც ერთი მშვიდობისა და უსაფრთხოების, ხოლო მეორე ჰუმანიტარულ საკითხებს განიხილავს.

ჟენევის საერთაშორისო დისკუსიების მორიგი რაუნდი 2020 წლის 31 მარტი-1 აპრილს გაიმართება.

This post is also available in: English (ინგლისური) Русский (რუსული)

მსგავსი/Related

Back to top button