ახალი ამბები

ცხინვალმა საპარლამენტო არჩევნების თარიღი გამოაცხადა

Tags

ოკუპირებული ცხინვალის ლიდერმა ანატოლი ბიბილოვმა რეგიონის საპარლამენტო არჩევნები 9 ივნისს დანიშნა.

ოკუპირებული რეგიონის 34-წევრიან საკანონმდებლო ორგანოში მანდატები შერეული პროპორციულ-მაჟორიტარული პრინციპით გადანაწილდება. 17 მანდატს პროპორციული სისტემით ის პარტიები გაინაწილებენ, რომლებიც 7 %-იან ბარიერს გადალახავენ, ხოლო დანარჩენ 17 ადგილს მაჟორიტარი დეპუტატები დაიკავებენ.

მომავალი არჩევნები რუსეთის პრეზიდენტს ვლადიმირ პუტინსა და ანატოლი ბიბილოვს შორის 6 მარტს გამართული შეხვედრის დღის წესრიგის ერთ-ერთი საკითხი იყო. რუსეთის პრეზიდენტი იმედოვნებს, რომ არჩევნები „კანონის და დემოკრატიული სტანდარტების შესაბამისად“ ჩატარდება.

ოკუპირებული რეგიონის ბოლო საპარლამენტო არჩევნებზე 2014 წელს ბიბილოვის პარტიამ „გაერთიანებული ოსეთი“ ხმების 44.84 % მიიღო და შედეგად 20-წევრიანი უმრავლესობა მოიპოვა.

თბილისი და საერთაშორისო თანამეგობრობა, რუსეთის და იმ ოთხი ქვეყნის გარდა, რომლებმაც ორი რეგიონის დამოუკიდებლობა აღიარეს, ოკუპირებული აფხაზეთისა და ცხინვალის რეგიონების არჩევნებს არალეგიტიმურად მიიჩნევენ.

This post is also available in: English (ინგლისური) Русский (რუსული)

Show More

Related Articles

Back to top button