თბილისი აპროტესტებს რუსეთის მიერ ე.წ აფხაზეთის საზღვრის გადაკვეთის გამარტივებას
საგარეო საქმეთა სამინისტრომ რუსეთის მხარეს საპროტესტო ნოტა გაუგზავნა, რომლითაც აპროტესტებს რუსეთის მთავრობის 21 მარტის დადგენილებას საქართველო-რუსეთის სახელმწიფო საზღვრის აფხაზეთის მონაკვეთზე არსებული არალეგიტიმური სასაზღვრო-გამშვები პუნქტისთვის “განთიადი-ადლერი“ საერთაშორისო სტატუსის მინიჭების მცდელობის თაობაზე.
“საგარეო საქმეთა სამინისტრო ამგვარ ქმედებას აფასებს, როგორც რუსეთის ფედერაციის მხრიდან საერთაშორისო სამართლის ფუძემდებლური პრინციპების, კერძოდ კი აღებული საერთაშორისო ვალდებულებების კეთილსინდისიერად შესრულების პრინციპის დარღვევად“, – ნათქვამია საგარეო უწყების მიერ 13 აპრილს გავრცელებულ განცხადებაში.
საგარეო უწყების ინფორმაციით, თბილისმა რამდენჯერმე შესთავაზა მოსკოვს საქართველო-რუსეთის სახელმწიფო საზღვრის აფხაზეთის და ცხინვალის რეგიონის მონაკვეთების გადაკვეთის დროებითი რეჟიმის განმსაზღვრელი წესის განხილვა, თუმცა რუსეთის მხარემ თავი შეიკავა.
ქართული მხარის მიერ გაგზავნილ საპროტესტო ნოტაში აღნიშნულია, რომ დღეისათვის საქართველო-რუსეთის სახელმწიფო საზღვარზე კანონიერ საფუძველზე ფუნქციონირებს მხოლოდ ერთი საკონტროლო-გამშვები პუნქტი “ყაზბეგი-ზემო ლარსი“ 1993 წლის 8 ოქტომბერს მიღწეული შეთანხმების საფუძველზე.