ნოღაიდელი აშშ–ში გაემგზავრა

პრემიერ– მინისტრი ზურაბ ნოღაიდელი დღეს აშშ–ში გაემგზავრა, სადაც 2 მარტს მონაწილეობას მიიღებს ფორუმში “ინვესტირება საქართველოში“.

“ძირითადად სამ მიმართულებაზე გაკეთდება აქცენტი: ენერგოობიექტების, ელექტროკავშირისა და ბათუმის პორტის პრივატიზაციაზე“, – განუცხადა ჟურნალისტებს გამგზავრებამდე ნოღაიდელმა.

პრემიერ–მინისტრი 3 მარტს ასევე გეგმავს შეხვედრას გაეროს გენერალურ მდივანთან კოფი ანანთან, სადაც “კონფლიქტების მოგვარების შესაძლებლობებს და სამშვიდობო პროცესებს ანუ მათ შეფერხებას განვიხილავთ“, – აცხადებს ნოღაიდელი.

პრემიერ–მინისტრს ვიზიტის დროს თან ახლავს სამთავრობო დელეგაცია, რომლის შემადგენლობაშიც შედიან  სახელმწიფო მინისტრი ეკონომიკური რეფორმების საკითხებში კახა ბენდუქიძე, ენერგეტიკის მინისტრი ნიკა გილაური და ეკონომიკის მინისტრი ირაკლი ჩოგოვაძე.