თავდაცვის მინისტრი ბრიუსელს სტუმრობს
თავდაცვის მინისტრი ირაკლი ოქრუაშვილი გერმანიაში ვიზიტის დასრულების შემდეგ 6 თებერვალს სამდღიანი ოფიციალური ვიზიტით ბრიუსელში გაემგზავრა. ნატო-ს შტაბ-ბინაში ქართული მხარე ჩრდილო-ატლანტიკური ალიანსის წევრი-სახელმწიფოების ელჩებსა და ორგანიზაციის მაღალი რანგის წარმომადგენლებს შეხვდა.
შეხვედრები შედგა ნატო-ს გენერალური მდივნის მოადგილესთან თავდაცვის პოლიტიკისა და დაგეგმარების საკითხებში ჯონ კოლსტონთან და ნატო-ს გენერალური მდივნის მოადგილესთან პოლიტიკურ საქმეთა და უსაფრთხოების პოლიტიკის საკითხებში მარტინ ერდმანთან. ირაკლი ოქრუაშვილი ასევე შეხვდა ნატო-ს გენერალური მდივნის წარმომადგენელს სამხრეთ კავკასიაში რობერტ სიმონსს.
თავდაცვის სამინისტროს საზოგადოებასთან და მასმედიასთან ურთიერთობის სამმართველოს ცნობით, შეხვედრების დროს განიხილებოდა ნატო-სთან საქართველოს ინდივიდუალური პარტნიორობის სამოქმედო გეგმის იმპლემენტაციის მიმდინარეობა და გაწევრიანების სამოქმედო გეგმაში საქართველოს ჩართვის საკითხები. ნატო-ს მხრიდან პოზიტიურად შეფასდა გეგმით გათვალისწინებული ვალდებულებების შესრულების მხრივ მიღწეული პროგრესი. შეხვედრებისას დაფიქსირდა ალიანსის მხარდაჭერა საქართველოს ნატო-ში სრული ინტეგრაციის საკითხთან დაკავშირებით.
შეხვედრებზე ასვე განხილულ იქნა საქართველოდან რუსეთის ბაზების გაყვანისა და ენერგოუსაფრთხოების საკითხები.
ვიზიტის დროს საქართველოს თავდაცვის მინისტრი ასევე შეხვდა თავის ბელგიელ კოლეგას ანდრე ფლაოს.