თურქეთს საქართველოსთან სავაჭრო ურთიერთობების გააქტიურება სურს
თურქული საინფორმაციო სააგენტო Anadolu თურქეთის საგარეო ვაჭრობის მინისტრის ქურსად ტუზმენის სიტყვებზე დაყრდნობით იტყობინება, რომ თურქეთს საქართველოსთან სავაჭრო ბრუნვის 500 მილიონი აშშ დოლარიდან 2 მილიარდამდე გაზრდა სურს მომდევნო წლებში.
თურქი მინისტრი, რომელიც 4 თებერვალს საქართველოს პრემიერ-მინისტრს ზურაბ ნოღაიდელს შეხვდა, ასევე აცხადებს, რომ ანკარას სურვილი აქვს საგრძნობლად გაიზარდოს თურქული ფირმების საქმიანობა საქართველოში.
საქართველოს პრემიერ-მინისტრი ზურაბ ნოღაიდელი, ენერგეტიკის და სახელმწიფო მინისტრებთან ერთად, თურქეთს 4-5 თებერვალს ეწვია. 4 თებერვალს თავის თურქ კოლეგასთან შეხვედრაზე ნოღაიდელმა ორმხრივი თანამშრომლობის საკითხი განიხილა.
4 თებერვალს თურქულ-ქართული ბიზნეს საბჭოს სხდომაზე გამოსვლისას პრემიერ-მინისტრმა ნოღაიდელმა მოუწოდა თურქ ბიზნესმენებს აქტიურად ადევნონ თვალი საქართველოში, კერძოდ კი ენერგოსექტორში წელს მიმდინარე საპრივატიზაციო პროცესს.