
მოსკოვი უარყოფს ბუშის საქართველოსა და ლატვიაში ვიზიტის გაპროტესტებას
რუსეთის საგარეო საქმეთა სამინისტრომ უარყო New York Times-ის მიერ გავრცელებეული ინფორმაცია იმის თაობაზე, რომ მოსკოვმა ლატვიასა და საქართველოში ამერიკის პრეზიდენტის ვიზიტი გააპროტესტა.
New York Times-ის მიერ 6 მაისს გავრცელებულ ინფორმაციაში ნათქვამია, რომ რუსეთის საგარეო საქმეთა მინისტრმა სერგეი ლავროვმა აშშ-ის სახელმწიფო მდივანს კონდოლიზა რაისს საპროტესტო წერილი გაუგზავნა პრეზიდენტ ბუშის პოსტ-საბჭოთა სახელმწიფოებში ვიზიტის თაობაზე.
“პირველ რიგში, არანაირი წერილი არ ყოფილა გაგზავნილი [აშშ-ის სახელმწიფო მდივნის სახელზე]. უბრალოდ შედგა საუბარი [კონდოლიზა რაისთან] სახელმწიფო დეპარტამენტთან შეხედულებების რეგულარული გაცვლის ჩარჩოებში. მეორეც, ის [საუბარი] ეფუძნებოდა ამერიკის შეერთებული შტატების სუვერენულ უფლებას თავისი შეხედულებისამებრ დაამყაროს საგარეო ურთიერთობები. ამ საუბარს [ლავროვსა და რაისს შორის] ერთი მიზანი ჰქონდა: განსაზღვრულიყო კონტექსტი, რომლის ფარგლებშიც პრეზიდენტის [ბუშის] ვიზიტი უნდა შემდგარიყო“, აცხადებს ალექსანდრე იაკოვენკო 6 მაისს გავრცელებულ საინფორმაციო შეტყობინებაში.
მისი თქმით, სერგეი ლავროვი კონდოლიზა რაისს 6 მაისს ტელეფონით ესაუბრა და ამ უკანასკნელმა განაცხადა, რომ “შედგა ბუშის ლატვიასა და საქართველოში ვიზიტთან დაკავშირებული შეხედულებების აბსოლუტურად ნორმალური გაცვლა და ამ საუბარში არაფერი ყოფილა ისეთი, რაც ამერიკული მხარის განაწყენებას გამოიწვევდა“.
This post is also available in: English (ინგლისური) Русский (რუსული)