25-ე ბრიგადის დისლოკაციის ადგილი თბილისში იქნება
პრეზიდენტმა სააკაშვილმა 21 აპრილს გამოსცა ბრძანებულება 25-ე ბრიგადის დისლოკაციის ადგილის შეცვლის შესახებ.
„25-ე ბრიგადის დისლოკაციის ადგილად განისაზღვრა თბილისი. მის შემადგენლობაში შევლენ ის ოფიცრები და ჯარისკაცები, რომელთაც უარი განაცხადეს დამორჩილებოდნენ ბრიგადის ყოფილი მეთაურის ბრძანებებს. მის შემადგენლობაში შევლენ ასევე ახალწვეულებიც“, – განაცხადა თავდაცვის მინისტრმა გელა ბეჟუაშვილმა 21 აპრილს გამართულ ბრიფინგზე.
„25-ე ბრიგადის თბილისში დისლოცირებულ სამხედროებს მაღალი ხელფასები ექნებათ, თუმცა ცოტა ნაკლები ვიდრე „წვრთნისა და აღჭურვის პროგრამით“ მომზადებულ ჯარისკაცებს აქვთ“, – დასძინა გელა ბეჟუაშვილმა. „წვრთნისა და აღჭურვის პროგრამით“ მომზადებული ჯარისკაცების ხელფასები 200 აშშ დოლარს შეადგენს.
თავდაცვის სამინისტროს წარმომადგენელთა თქმით, 25-ე ბრიგადის დაახლოებით 40-ე ოფიცერმა უარი განაცხადა დამორჩილებოდა ყოფილი მეთაურის რომან დუმბაძის ბრაძანებებს, რომელიც თავის მხრივ ცენტრალურ ხელისუფლებას აღარ ემორჩილება.
დუმბაძის დაპატიმრების სანქცია სასამართლომ უკვე გასცა. მას ღალატში ედება ბრალი.