არასამთავრობო ორგანიზაცია ცსკ-ს სასამართლოში უჩივის
საქართველოს ახალგაზრდა იურისტთა ასოციაციამ (საია), რომელმაც 28 მარტის საპარლამენტო არჩევნებზე მონიტორინგი განახორციელა, სასამართლოს მიმართა თხოვნით გააუქმოს ცენტრალური საარჩევნო კომისიის (ცსკ) გადაწყვეტილება აჭარის ორ საარჩევნო ოლქში განმეორებითი არჩევნების ჩატარების თაობაზე.
2 აპრილს ცსკ-მ არჩევნების შედეგები ხულოსა და ქობულეთის საარჩევნო ოლქებში გააუქმა. ეს ის ოლქებია, სადაც „აღორძინების კავშირმა“ ხმების უმეტესობა მიიღო.
ცსკ-ს თავმჯდომარის ზურაბ ჭიაბერაშვილის განმარტებით, ეს გადაწყვეტილება 28 მარტს დაფიქსირებული მთელი რიგი დარღვევების გამო იქნა მიღებული. განმეორებითი არჩევნები 18 აპრილს ჩატარდება.
თუმცა, საიას განცხადებით, საარჩევნო კოდექსის მიხედვით, ცსკ-ს არ აქვს უფლება გააუქმოს საარჩევნო ოლქის შედეგები. მხოლოდ სასამართლოს აქვს ამის უფლება.
იმ შემთხვევაში, თუ სასამართლო დადებითად გადაწყვეტს საიას სარჩელს, აჭარის ორ ოლქში დაგეგმილი განმეორებითი არჩევნები აღარ ჩატარდება.