ბელარუსმა ქართველი დეპუტატების დეპორტაცია განახორციელა
ქართველ პარლამენტართა ჯგუფი, რომელიც ბელარუსის სპეცსამსახურს სამი დღის განმავლობაში დაკავებული ჰყავდა, 18 მარტს დეპორტირებულ იქნა საქართველოში. ქართველი დეპუტატები მინსკში 19 მარტის საპრეზიდენტო არჩევნების მონიტორინგის მიზნით ჩავიდნენ.
“ბელარუსის სპეცსამსახურმა ჩასვლისთანავე დაგვაკავა [16 მარტს]. შემდეგ რაღაც უცნობ შენობაში შეგვიყვანეს, სადაც დაგვკითხეს, როგორც ტერორიზმთან დაკავშირებული საქმის სავარაუდო მოწმეები. რამდენიმე ქართველ მოქალაქეს, მათ შორის [პარლამენტის თავდაცვისა და უშიშროების კომიტეტის თავმჯდომარეს] გივი თარგამაძეს ტერორიზმის მცდელობაში ედება ბრალი“, – განუცხადა დეპუტატმა დავით კირკიტაძემ ჟურნალისტებს თბილისში ჩამოსვლისას.
“თითოეულ დეპუტატს ოთხი პირი იცავდა. თავიდან გვითხრეს, რომ ჩვენი პასპორტები წესრიგში არ იყო. სამი დღე ყოველგვარი ახსნა-განმარტების გარეშე გაგვაჩერეს. ეს კიდევ ერთხელ ადასტურებს, რომ ბელარუსის ხელისუფლებას ეშინია თავისუფალი დამკვირვებლების და თავისუფალი აზრის“, – განაცხადა დეპუტატმა ბიძინა ბრეგაძემ.