გიორგი ტყემალაძე თბილისის ვიცე-მერად დაინიშნა
თბილისის ვიცე-მერის თანამდებობას გიორგი ტყემალაძე დაიკავებს, განაცხადა თბილისის მერმა კახა კალაძემ 21 მაისს გამართულ ბრიფინგზე. ტყემალაძე ამ პოსტზე ირაკლი ხმალაძეს შეცვლის, რომელიც ცოტა ხნის წინ იუსტიციის მინისტრის მოადგილე გახდა.
ტყემალაძეს მანამდე დედაქალაქის საკრებულოს თავმჯდომარის პოსტი ეკავა. იგი წინა მოწვევის საკრებულოსაც თავმჯდომარეობდა.
„ყველა პროექტი, რაც ხორციელდება და გაკეთდა დედაქალაქში, რა თქმა უნდა, საკრებულოს და უშუალოდ გიორგის მონაწილეობით განხორციელდა“, – განაცხადა კალაძემ. „დარწმუნებული ვარ, მისი კვალიფიკაცია, მისი ჩართულობა, დაგვეხმარება და გავაგრძელებთ იმ წამოწყებულ მნიშვნელოვან საქმეებსა და პროექტებს. მინდა, მას წარმატება ვუსურვო ამ მნიშვნელოვან თანამდებობაზე. საკმაოდ ამბიციური გეგმები გვაქვს“.
კალაძის თქმით, ახლად დანიშნული ვიცე-მერი დიდი ხანია ქალაქის თვითმმართველობაში მნიშვნელოვან როლს ასრულებს და მოსალოდნელია, რომ ის წამყვან როლს შეასრულებს თბილისის ურბანული განვითარებისა და სტრატეგიული დაგეგმარების სამომავლო საქმიანობაში.
ასევე წაიკითხეთ:
- 29/04/2025 – „ქართული ოცნების“ იუსტიციის მინისტრის მოადგილედ მერაბ ტურავა დაინიშნა
- 05/04/2025 – ოხანაშვილმა სახელმწიფო უსაფრთხოების სამსახურში თავისი მოადგილეები წარადგინა
- 02/04/2025 – „ქართული ოცნების“ მთავრობაში ცვლილებები გამოცხადდა
This post is also available in: English Русский