ესტონეთის პარლამენტმა ქართველი ხალხის მხარდამჭერი განცხადება მიიღო

ესტონეთის პარლამენტმა 22 იანვარს 59 ხმით 9-ის წინააღმდეგ საქართველოს ხალხის მხარდასაჭერად განცხადება მიიღო, რომელშიც ნათქვამია, რომ არ ცნობს საქართველოში გაყალბებული არჩევნების შედეგებს და „არ აღიარებს საქართველოს პარლამენტის, მთავრობის ან პრეზიდენტის ლეგიტიმურობას“.

განცხადებაში ნათქვამია, რომ ესტონეთი პატივს სცემს ყველა ქვეყნის უფლებას დემოკრატიულად აირჩიოს თავისი გზა და, ამის გათვალისწინებით, ხაზგასმულია, რომ ის მხარს უჭერს საქართველოს განვითარებას მას შემდეგ, რაც ესტონეთმა დამოუკიდებლობა მოიპოვა და ეწინააღმდეგება რუსეთის ქმედებებს, რომლებიც საფრთხეს უქმნის საქართველოს სუვერენიტეტს და ანადგურებს მის ტერიტორიულ მთლიანობას.

განცხადებაში ასევე ნათქვამია, რომ საქართველოში 26 ოქტომბრის საპარლამენტო არჩევნების შედეგები, რომელიც „ძალადობისა და დაშინების ატმოსფეროში“ ჩატარდა, არ ასახავს ქართველი ხალხის თავისუფალ ნებას. მასში ხაზგასმულია, რომ მმართველი პარტია, „რომელიც რუსეთის ფედერაციის მხარდაჭერით სარგებლობს“, არჩევნების „გაყალბებულ“ შედეგებს „სახელმწიფო ინსტიტუტებზე სრული კონტროლის მისაღწევად“ და განსხვავებული აზრის ჩასახშობად იყენებს.

ამიტომ, ესტონეთის პარლამენტი აცხადებს, რომ არ ცნობს ოქტომბრის არჩევნების შედეგად „დანიშნული“ საქართველოს პარლამენტის, მთავრობისა და პრეზიდენტ მიხეილ ყაველაშვილის ლეგიტიმურობას. განცხადებაში სალომე ზურაბიშვილი ქვეყნის ლეგიტიმურ პრეზიდენტადაა აღიარებული.

განცხადება მხარდაჭერას უცხადებს საქართველოში არსებულ დემოკრატიულ ძალებს, რომლებიც ახალ არჩევნებს ითხოვენ. ის გმობს მშვიდობიანი მომიტინგეების წინააღმდეგ რეპრესიებს, ძალადობისა და დევნის შეწყვეტისა და „ყველა პოლიტპატიმრის“ გათავისუფლებისკენ მოუწოდებს.

ესტონეთის პარლამენტი ასევე მოუწოდებს საქართველოს პოლიტიკურ ძალებს გაითვალისწინონ საერთაშორისო ორგანიზაციების კრიტიკა, მათ შორის ოქტომბრის არჩევნების შესახებ ეუთო/ოდირის საბოლოო ანგარიში.

ესტონეთის პარლამენტი მოუწოდებს სხვა ეროვნულ პარლამენტებს დაგმონ „ქართული ოცნების“ რეჟიმის ძალადობა მოქალაქეების მიმართ. ის ასევე მოუწოდებს ევროკავშირისა და ევროკომისიის წევრ ქვეყნებს, სანქციები დაუწესონ საქართველოს ხელისუფლებას, რომელიც მშვიდობიანი მომიტინგეებისა და სამოქალაქო საზოგადოების რეპრესიებშია ჩართული, „მკაცრად შეზღუდონ“ კომუნიკაცია საქართველოს ხელისუფლებასთან თავისუფალი და სამართლიანი არჩევნების ჩატარებამდე და მხარი დაუჭირონ საქართველოს სამოქალაქო საზოგადოებას და პრესას, რომელიც „აგრძელებს მუშაობას თავისუფალი საზოგადოების სახელით, მიუხედავად დაშინებისა და დევნისა“.

„რიიგიკოგუ სოლიდარობას უცხადებს ქართველ ერს, რომელიც იცავს თავის ადამიანის უფლებებს, კონსტიტუციას, დემოკრატიას და საქართველოს მომავალს ევროკავშირის ფარგლებში“, – ნათქვამია განცხადებაში.

დეკემბერში ესტონეთმა სანქციები დაუწესა ათეულობით ქართველს, მათ შორის „ქართული ოცნების“ დამფუძნებელს ბიძინა ივანიშვილს, „ქართული ოცნების“ პრემიერ-მინისტრს ირაკლი კობახიძეს, ასევე სხვა მინისტრებსა და მაღალჩინოსნებს, და მათ ქვეყანაში შესვლა აუკრძალა.

ასევე წაიკითხეთ:

• 16/12/2024 – ესტონეთი კობახიძესა და 14 სხვა თანამდებობის პირს დარბევის გამო სანქციებს უწესებს
• 02/12/2024 – ლიეტუვამ, ესტონეთმა და ლატვიამ ივანიშვილსა და შსს-ს მაღალჩინოსნებს სანქციები დაუწესეს
• 01/12/2024 – ევროკავშირის ლიდერები „წუხილს გამოთქვამენ“ ქართული ოცნების გადაწყვეტილების გამო
• 27/10/2024 – ევროპელი დეპუტატები: ევროკავშირი ვერ ცნობს 26 ოქტომბრის არჩევნების შედეგებს

This post is also available in: English (ინგლისური) Русский (რუსული)