სასამართლომ აფგან სადიგოვის აზერბაიჯანში ექსტრადიციის გადაწყვეტილება მიიღო

თბილისის საქალაქო სასამართლომ 28 ნოემბერს დააკმაყოფილა პროკურატურის შუამდგომლობა და აზერბაიჯანელი ჟურნალისტის აფგან სადიგოვის აზერბაიჯანში ექსტრადიციის გადაწყვეტილება მიიღო.

სადიგოვი თბილისის იზოლატორში 21 სექტემბრიდან შიმშილობს. შიმშილობის მე-17 დღეს იგი ჯანმრთელობის გაუარესების გამო საავადმყოფოში გადაიყვანეს.

მისი ადვოკატის თქმით, სადიგოვი ექსტრადირების შემთხვევაში პოლიტიკურ დევნას, წამებასა და არასათანადო მოპყრობას ვერ გადაურჩება, მისი ჟურნალისტური საქმიანობისა და აზერბაიჯანის ხელისუფლების კრიტიკის გამო.

აფგან სადიგოვის მეუღლემ სევინჯ სადიგოვამ განაცხადა, რომ არ ელოდა ლეგიტიმურ შედეგს. მისი თქმით, ივანიშვილმა სასამართლო იყიდა და ალიევის ბრძანებებს ასრულებს.

საერთაშორისო ორგანიზაციების ცნობით და შეფასებით, აფგან სადიგოვი წლების განმავლობაში იდევნებოდა სწორედ მისი კრიტიკული ჟურნალისტური საქმიანობის გამო. თუმცა, სასამართლომ უგულებელყო ყველა წუხილი სიცოცხლისათვის სახიფათო რისკებთან დაკავშირებით, რომლებიც სადიგოვს შეიძლება აზერბაიჯანის ციხეში შეექმნას.

სადიგოვის ადვოკატებს შვიდი დღე აქვთ სააპელაციო სასამართლოში სარჩელის შესატანად, რასაც მოჰყვება უზენაეს სასამართლოში გასაჩივრება. თუ სამივე ინსტანცია დაადგენს, რომ სადიგოვი უნდა გადაეცეს აზერბაიჯანს, მაშინ ექსტრადიციის პროცესი გაგრძელდება.

გავრცელებული ინფორმაციით, ჟურნალისტი საქართველოში გასული წლის დეკემბრიდან ცხოვრობს. სადიგოვი აზერბაიჯანში 2020 წლის მაისში გამოძალვის ბრალდებით დააკავეს. მოგვიანებით მას შვიდი წლით თავისუფლების აღკვეთა მიუსაჯეს, რომელიც საბოლოოდ უზენაესმა სასამართლომ ოთხ წლამდე შეამცირა. თუმცა, დაახლოებით ორი წლის პატიმრობის შემდეგ ამნისტიით გაათავისუფლეს. მან 242 დღის განმავლობაში შიმშილობა გამოაცხადა.

საერთაშორისო ორგანიზაციებმა, მათ შორის Amnesty International-მა და ეუთო-მ, მოუწოდეს საქართველოს არ გადასცეს აფგან სადიგოვი აზერბაიჯანს.

This post is also available in: English (ინგლისური) Русский (რუსული)