ჭიათურელმა მაღაროელებმა „ჯორჯიან მანგანეზთან“ შეთანხმებას მიაღწიეს
ხუთდღიანი გაფიცვის შემდეგ ჭიათურელმა მაღაროელებმა „ჯორჯიან მანგანეზთან“ შეთანხმებას მიაღწიეს. ერთ-ერთმა მაღაროელმა 5 დეკემბერს „ფეისბუქზე“ ჩართვისას განაცხადა, რომ კომპანია 12-საათიან სამუშაო რეჟიმზე გადასვლასთან დაკავშირებით დარკვეთის მაღაროში დასაქმებულთა მოთხოვნას დათანხმდა. “ჯორჯიან მანგანეზმა” დაუდასტურა “სამოქალაქო საქართველოს”, რომ მაღაროელთა ყველა მოთხოვნა დაკმაყოფილდა.
12-საათიანი გრაფიკის შემოღებასთან ერთად, კომპანიამ პირობა დადო, რომ ხელფასებში სხვაობასაც მოაგვარებდა. საქმე ეხებოდა იმ ფაქტს, რომ როცა 12-საათიანი გრაფიკის ანაზღაურება 164 ლარია, ისევე როგორც იმ მაღაროელებისთვის, რომლებიც უკვე მუშაობენ 12-საათიან ცვლაში, გაფიცულებს 155 ლარი შესთავაზეს, რაც 9 ლარით ნაკლებია
კიდევ ერთი საკითხი, რომელიც მოგვარებას საჭიროებდა, ეხებოდა საათობრივი ანაზღაურების გათანაბრებას 8-საათიან და 12-საათიან რეჟიმში მომუშავე მაღაროელებს შორის. როგორც ერთ-ერთმა მაღაროელმა „ფეისბუქით“ ჩართვის დროს განაცხადა, კომპანიამ მაღაროელებს „ჯორჯიან მანგანეზის“ მიმდინარე ფინანსური კრიზისის გათვალისწინება და ექვსთვიანი ვადის მიცემა სთხოვა.
დარკვეთის მაღაროში დასაქმებულები 1 დეკემბრიდან გაიფიცნენ. აქციას „ჯორჯიან მანგანეზის“ 700-მდე მუშაკი სოლიდარობის ნიშნად შეუერთდა და მუშაობა შეწყვიტა.
ასევე წაიკითხეთ:
- 23/06/2023 – „ჯორჯიან მანგანეზი“ მზადაა ჭიათურის მაღაროები მაღაროელებს მართვაში გადასცეს
- 19/06/2023 – ჭიათურაში გაფიცული მაღაროელების მხარდასაჭერად პარლამენტთან აქცია მიმდინარეობს
- 16/06/2023 – ჭიათურელმა მაღაროელებმა პროტესტის უკიდურეს ზომას მიმართეს
- 12/06/2023 – ჭიათურელი მაღაროელები ხელფასების ზრდისა და უკეთესი შრომის პირობების მოთხოვნით გაიფიცნენ
This post is also available in: English (ინგლისური) Русский (რუსული)
