Placeholder canvas
ახალი ამბები

ომში ჩათრევის თაობაზე ღარიბაშვილის განცხადებას კრიტიკა მოჰყვა

საქართველოს პრემიერმინისტრი, ირაკლი ღარიბაშვილი საერთაშორისო პარტნიორების კრიტიკის სამიზნე გახდა მას შემდეგ, რაც მან ევროპარლამენტარები და უკრაინა საქართველოს ომში ჩათრევის მცდელობაში დაადანაშაულა.

ამერიკელმა პოლიტიკოსმა და ყოფილმა კონგრესმენმა, ადამ კინზინგერმა კატეგორიულად უარყო ღარიბაშვილის განცხადება და მას „აბსოლუტური ტყუილი“ უწოდა. კინზინგერის თქმით, ღარიბაშვილის განცხადება რუსეთთან მლიქვნელობის მცდელობა იყო.

ევროპარლამენტარი ვიოლა ფონ კრამონი ასევე გამოეხმაურა ღარიბაშვილის ბრალდებას, რომ 100 ევროპარლამენტარი იყო ჩართული კორუფციულ სკანდალში. მან წყარო მოითხოვა და აღნიშნა, რომ კორუფციაში დადანაშაულებული ევროპარლამენტების უმეტესობა ქართული ოცნების პარტნიორი პარტიიდან იყვნენ.

ესტონეთის ყოფილმა პრეზიდენტმა, ტოომას ჰენდრიკ ილვესმა ასევე დაგმო ღარიბაშვილის განცხადება და აღნიშნა, რომ თუ პრემიერმინისტრს ნამდვილად გონია, რომ ევროპა კარნახობს საქართველოს, მაშინ ალბათ ევროპა არ არის მისთვის შესაფერისი ადგილი. ყოფილმა პრეზიდენტმა ხაზი გაუსვა, რომ ევროპას არ სჭირდება ისინი, ვინც ასე ექცევა მას.

უკრაინის საგარეო საქმეთა სამინისტროს პრესპიკერმა, ოლეგ ნიკოლენკომ განაცხადა, რომ ბოლო რამდენიმე დღის განმავლობაში საქართველოს პრემიერმინისტრმა და პარლამენტის ხელმძღვანელობამ რიგი არამეგობრული განცხადებები გააკეთეს უკრაინასთან მიმართებით. „რუსეთის პროპაგანდის თეზისების ოსტატურად გამეორებით, საქართველოს ხელისუფლებამ უკრაინა საქართველოში გადატრიალების მზადებაში, რუსეთთან ომში ჩათრევაში და სამოქალაქო ომის გასაჩაღებლად ძალების გაგზავნაში დაადანაშაულა“, – განაცხადა ნიკოლენკომ და ბრალდებები კატეგორიულად უარყო.

უკრაინის „რადას“ ფრაქცია „ხალხის მსახურის“ თავმჯდომარემ, დავით არახამიამ „ტელეგრამზე“ დაწერა, რომ საქართველოში დემოკრატიის დაცვა მსოფლიო თანამეგობრობის უპირველესი პასუხისმგებლობაა იმ ფონზე, როდესაც, მისი თქმით, საქართველოს ხელისუფლება სავსეა რუსი აგენტებით. არახამიამ განაცხადა, რომ ქართველ ხალხს ესმის ეს, პრემიერმინისტრი კი ისე იჭერს თავს, რომ არ ესმის. მისი თქმით, უკრაინაში არავის სურს საქართველოს ომში ჩათრევა.

ასევე წაიკითხეთ:

This post is also available in: English (ინგლისური) Русский (რუსული)

მსგავსი/Related

Back to top button