პრემიერმინისტრი საუდის არაბეთს სტუმრობდა
საქართველოს პრემიერმინისტრი, ირაკლი ღარიბაშვილი სამთავრობო დელეგაციასთან ერთად 21-22 დეკემბერს საუდის არაბეთის სამეფოს სტუმრობდა, სადაც იგი საუდის არაბეთის სამეფოს ტახტის მემკვიდრეს, პრემიერ-მინისტრ პრინც მოჰამედ ბინ სალმან ბინ აბდულაზიზ ალ საუდს შეხვდა.
საქართველოს მთავრობის ადმინისტრაციის პრესსამსახურის ცნობით, შეხვედრაზე მხარეებმა ორ ქვეყანას შორის თანამშრომლობის პოზიტიური დინამიკა მიმოიხილეს და ეკონომიკური თანამშრომლობის გაღრმავების პერსპექტივებზე იმსჯელეს.
Grateful to HRH Mohammed bin Salman Al Saud, Crown Prince & PM of ?? for the warm welcome & productive talks in the frames of my visit to ??. Discussed current regional & global challenges & the possibility of expanding ?? – ?? partnership in areas of our common interest. pic.twitter.com/74C1Pb4lDI
— Irakli Garibashvili (@GharibashviliGe) December 22, 2022
მათვე „საქართველოს, როგორც აზიისა და ევროპის დამაკავშირებელი სატრანზიტო ჰაბის და დიდი პოტენციალის მქონე სატრანსპორტო დერეფნის, გაზრდილ როლსა და მნიშვნელობას“ გაუსვეს ხაზი.
ტურიზმის სფეროში არსებული თანამშრომლობის გაღრმავების პერსპექტივებზე საუბრისას, პრემიერმა ღარიბაშვილმა აღნიშნა, რომ „ტურიზმი საქართველოს ეკონომიკის სწრაფად მზარდი სექტორია, საუდის არაბეთის მოქალაქეები უვიზო რეჟიმით სარგებლობენ და მისასალმებელია, რომ საუდის არაბეთიდან შემოსული ვიზიტორების რაოდენობა ყოველწლიურად იზრდება“.
შეხვედრაზე საინვესტიციო მიმართულებებზეც ისაუბრეს, რა დროსაც, ირაკლი ღარიბაშვილმა აღნიშნა, რომ „საქართველო საუდის არაბეთისთვის მიმზიდველი ქვეყანაა როგორც სახელმწიფო საინვესტიციო ფონდების, ისე კერძო ბიზნესის მიმართულებით“. „პრემიერ-მინისტრის თქმით, საქართველოს მთავრობა მიესალმება საუდის არაბეთის სამეფოდან უფრო მეტი ინვესტორის შემოსვლას საქართველოში“.
საქართველოს მთავრობის ადმინისტრაციამ მხარეთა ერთობლივი განცხადების ტექსტიც გაავრცელა, რომლის თანახმადაც, საქართველოსა და საუდის არაბეთის პრემიერებმა რუსეთ-უკრაინის ომზეც იმსჯელეს და ხაზი გაუსვეს გაუსვეს „დავის მშვიდობიანი გზით გადაწყვეტის მნიშვნელობას და ვითარების ესკალაციის ყველა შესაძლო გზითა და საშუალებით შემცირების აუცილებლობას, რაც ხელს შეუწყობს უსაფრთხოებისა და სტაბილურობის აღდგენას, ხოლო ხსენებული კრიზისის უარყოფით შედეგებს შეამცირებს“.
ასევე წაიკითხეთ:
