ახალი ამბები

თითქმის ერთწლიანი პაუზის შემდეგ საქართველოს ელჩი კიევში დაბრუნდა 

უკრაინაში საქართველოს ელჩი თეიმურაზ შარაშენიძე 21 აპრილს კიევში მას შემდეგ დაბრუნდა, რაც თითქმის ერთი წლის წინ საქართველოს ხელისუფლებამ იგი უკრაინის პრეზიდენტის, ვოლოდიმირ ზელენსკის გადაწყვეტილების გამო კონსულტატებისთვის გამოიხმო, რომელმაც საქართველოს ყოფილი პრეზიდენტი მიხეილ სააკაშვილი უკრაინაში რეფორმების აღმასრულებელი კომიტეტის თავმჯდომარედ დანიშნა.

საქართველოს საგარეო საქმეთა სამინისტროს ინფორმაციით, ელჩი უკვე შეხვედა უკრაინის საგარეო საქმეთა მინისტრ დმიტრო კულებას და მინისტრის მოადგილე ვასილ ბოდნარს. სამინისტროს ინფორმაციით, უკრაინული მხარე მიესალმა თბილისის გადაწყვეტილებას ელჩის დაბრუნების თაობაზე და „პოზიტიურად შეაფასა აღნიშნული ნაბიჯი, განსაკუთრებით უკრაინის საზღვრებთან და დროებით ოკუპირებულ ტერიტორიებზე სამხედრო ესკალაციის ფონზე“.

უწყებისვე ცნობით, საქართველოს ელჩმა ქვეყნის სახელით კიდევ ერთხელ სოლიდარობა და მხარდაჭერა გამოუცხადა უკრაინის სახელმწიფოსა და უკრაინელ ხალხს. „მხარეებმა გამოთქვეს მზადყოფნა აქტიურად ითანამშრომლონ საქართველოსა და უკრაინის სტრატეგიული პარტნიორობის შემდგომი გაღრმავების მიმართულებით“, – ნათქვამია სამინისტროს პრესრელიზში.

უკრაინის საგარეო საქმეთა სამინისტროს ინფორმაციით, შეხვედრაზე ვასილ ბოდნარმა აღმოსავლეთ უკრაინაში და აზოვი-შავი ზღვის რეგიონში უსაფრთხოების კუთხით არსებული ვითარების გაუარესებაზე ისაუბრა, რაც, მისი თქმით, „რუსეთის პროვოკაციულ და დესტაბილიზაციის გამომწვევ ქმედებებს უკავშირდება“. მან ასევე აღნიშნა, რომ მოსკოვი არ იცავს ცეცხლის შეწყვეტის შეთანხმებას და არ გაჰყავს საკუთარი შეიარაღებული ძალები.

უკრაინის საგარეო უწყების ინფორმაციით, პრეზიდენტი სალომე ზურაბიშვილი და პრეზიდენტი ზელენსკი საქართველოს ელჩის დაბრუნებაზე 15 აპრილს სატელეფონო საუბრისას შეთანხმდნენ. მანამადე, 9 აპრილს, საქართველოს პრეზიდენტმა ხელისუფლებას სოლიდარობის ნიშნად უკრაინაში საქართველოს ელჩის დაუყონებლივ დაბრუნებისკენ მოუწოდა.

ასევე წაიკითხეთ:

This post is also available in: English (ინგლისური) Русский (რუსული)

მსგავსი/Related

Back to top button