ეროვნულმა ბანკმა რეფინანსირების განაკვეთი 8.5%-მდე გაზარდა

საქართველოს ეროვნული ბანკის მონეტარული პოლიტიკის კომიტეტმა 17 მარტს გამართულ სხდომაზე რეფინანსირების განაკვეთი 50 საბაზისო პუნქტით – 8.5%-მდე გაზარდა და ამის მიზეზად, სხვა ფაქტორებთან ერთად, ინფლაციის ზრდის რისკები დაასახელა.

ეროვნული ბანკის განცხადებით, „ამ ეტაპზე, წლის განმავლობაში, პოლიტიკის დამატებითი გამკაცრების საჭიროება არ იკვეთება“.

ეროვნული ბანკის თქმით, თებერვალში წლიური ინფლაცია 3.6% იყო და გასული წლის დეკემბრიდან ინფლაციის შემცირება მთავრობის მიერ კომუნალური გადასახადების სუბსიდირებამ განაპირობა, რაც დროებითი ხასიათისაა.

• საქსტატი: თებერვალში წლიური ინფლაცია 3.6% იყო
• საქსტატი: იანვარში ქვეყნის ეკონომიკა 11.5%-ით შემცირდა

სებ-ის განცხადებით, ინფლაციის დინამიკაზე მოქმედ ფაქტორებს შორის კვლავ სახეზეა საერთაშორისო სასაქონლო ბაზრებზე ფასების ზრდა. „ამასთან, პანდემიით გამოწვეული გამოშვების შემცირების გამო პროდუქციაზე საშუალო დანახარჯები გაზრდილია, რაც ინფლაციაზე აღმავალი ზეწოლის კიდევ ერთი წყაროა“, – აცხადებენ ეროვნულ ბანკში.

სებ-ის პროგნოზით, 2021 წელს ინფლაცია საშუალოდ 4-4.5%-ის ფარგლებში იქნება და მიზნობრივ 3%-იან მაჩვენებელს ეტაპობრივად დაუახლოვდება. ეროვნული ბანკის განცხადებით, კოვიდ-19-ის შეზღუდვების შემსუბუქების ფონზე, მიმდინარე წელს ეკონომიკური აქტივობის ეტაპობრივი აღდგენაა მოსალოდნელი, რომლის მთავარი მამოძრავებელი ძალა ადგილობრივი მოთხოვნა იქნება.

მონეტარული პოლიტიკის კომიტეტის შემდეგი სხდომა 2021 წლის 28 აპრილს ჩატარდება.

ასევე წაიკითხეთ:

• ეროვნულმა ბანკმა რეფინანსირების განაკვეთი კვლავ 8%-ზე დატოვა
• ეროვნულმა ბანკმა რეფინანსირების განაკვეთი 8%-ზე დატოვა
• ეროვნულმა ბანკმა რეფინანსირების განაკვეთი 8%-ზე დატოვა
• ეროვნულმა ბანკმა რეფინანსირების განაკვეთი 8%-ზე დატოვა

This post is also available in: English (ინგლისური) Русский (რუსული)