TI (კვლევა): კორუფცია საქართველოში მნიშვნელოვან გამოწვევად რჩება

არასამათავრობო ორგანიზაცია „საერთაშორისო გამჭვირვალობა საქართველოს“ (TI) მიერ 12 აპრილს გამოქვეყნებული საზოგადოებრივი აზრის კვლევის შედეგების მიხედვით, საქართველოში კორუფცია კვლავ მნიშვნელოვან გამოწვევად რჩება.

კორუფცია – წვრილმანი და კომპლექსური ფორმები

კვლევის შედეგების მიხედვით, გამოკითხულების 1% ამბობს, რომ ბოლო 12 თვის განმავლობაში, მას ან მისი ოჯახის რომელი წევრს ქრთამი მოსთხოვეს, 98% ამბობს, რომ არა, 1%-ს კი კითხვაზე პასუხი არ აქვს. ამავე დროს, გამოკითხულების 59% თქმით, საჯარო მოხელეები საკუთარ თანამდებობას ბოროტად იყენებენ (ძალიან გავრცელებულია/უფრო გავრცელებულია, ვიდრე არ არის გავრცელებული), 21%-ის მოსაზრებით კი, მსგავს შემთხვევებს ადგილი არ აქვს (საერთოდ არ არის გავრცელებული/უფრო არ არის გავრცელებული, ვიდრე გავრცელებულია).

ამასთან, გამოკითხულების 36% ამბობს, რომ საჯარო მოხელეები თანამდებობებს პირადი მიზნების მისაღწევად იყენებენ (ძალიან გავრცელებულია/უფრო გავრცელებულია ვიდრე არ არის გავრცელებული), 15% ფიქრობს, რომ არა (საერთოდ არ არის გავრცელებული/უფრო არ არის გავრცელებული ვიდრე გავრცელებული), 33%-ის შეფასებით კი, ნაწილობრივ იყენებენ.

რესპონდენტებს 91% (მათგან ვინც, ფიქრობს, რომ საჯარო მოხელეები საკუთარ თანამდებობებს ბოროტად იყენებენ) მიიჩნევს, საჯარო მოხელეები საკუთარ თანამდებობებს ოჯახის წევრების, ნათესავებისა და ახლობლების დასაქმების მიზნით იყენებენ; 86%-ის აზრით, საკუთარი ახლობლების ბიზნესის მფარველობისთვის; 79%-ის შეფასებით, ბიუჯეტის თანხების არამიზნობრივი ხარჯვისთვის; 58%-ის მოსაზრებით კი, სხვადასხვა საქმის „მოგვარების“ სანაცვლოდ ქრთამის აღებისთვის.

კვლევა სახელმწიფო ტენდერების შესახებ კითხვასაც მოიცავდა. რესპონდენტების 52% მიიჩნევს, რომ სახელმწიფო შესყიდვების დროს თანამდებობის პირებთან დაკავშირებული კომპანიებისთვის უპირატესობის მინიჭება გავრცელებულია (ძალიან გავრცელებული/უფრო გავრცელებულია, ვიდრე არ არის გავრცელებული), 13% კი ფიქრობს, რომ მსგავსი რამ გავრცელებული არ არის (საერთოდ არ არის გავრცელებული/უფრო არ არის გავრცელებული, ვიდრე გავრცელებულია).

რეაგირება კორუფციის შემთხვევებზე

რესპონდენტების 51% ფიქრობს, რომ როდესაც საქმე მაღალი თანამდებობის პირებს ან მმართველ პარტიასთან დაკავშირებულ გავლენიან ადამიანებს ეხება, კორუფციის შემთხვევების სათანადო გამოძიება არ ხდება. ამასთან, გამოკითხულების 42%-ის მოსაზრებით, ხელისუფლება როგორც წესი კორუფციულ გარიგებებში ჩართულ პირებს ხელს აფარებს (სრულიად ვეთანხმები/ვეთანხმები).

რესპონდენტებს კითხვა ყოფილი მთავარი პროკურორის ოთარ ფარცხალაძის შესახებაც დაუსვეს. მათი 41%, ვისაც ფარცხალაძის შესახებ სმენია, ამბობს, რომ ის კორუფციულ გარიგებებშია ჩართული, 48%-ის მოსაზრებით, მის ქმედებებს ხელს ხელისუფლება აფარებს. 38%-ის შეფასებით, ის ივანიშვილთან დაახლოებული პირია, რომელიც საქმეებს არაფორმალურად „აგვარებს“. 29% ამბობს, რომ ის პროკურატურის არაფორმალური მმართველია. 33% კი მიიჩნევს, რომ ის საკუთარ მოვალეობას კარგად ვერ ასრულებდა.

საჯარო სამსახურში დასაქმება

კითხვარი საჯარო სამსახურში დასაქმების შესაძლებლობის შესახებ კითხვასაც მოიცავდა. გამოკითხულების 31% აცხადებს, რომ საჯარო უწყებაში სამსახურის დასაწყებად ნაცნობია საჭირო. 28% ამის მთავარ წინაპირობად განათლებას, 19% კი პროფესიონალიზმსა და სამუშაო გამოცდილებას ასახელებს.

This post is also available in: English (ინგლისური) Русский (რუსული)