რუსეთი შსკ-ს სხდომისადმი ოპტიმისტურადაა განწყობილი
შერეული საკონტროლო კომისიის (შსკ) სხდომის ჩატარებასთან დაკავშირებით, რომელიც 17-18 აგვისტოს მოსკოვში იმართება, რუსული მხარე იმედს გამოთქვმს, რომ შეხვედრა „ახალ იმპულს მისცემს“ მოლაპარაკაბებების პროცესს.
„რუსული მხარე მოელის, რომ მოსკოვის შსკ-ს სხდომა განამტკიცებს იმ პოზიტივს, რომელიც მიღწეულ იქნა კომისიის შეხვედრებზე ქართულ-ოსური კონფლიქტის დარეგულირების მიზნით“, – ნათქვამია რუსეთის საგარეო საქმეთა სამინისტროს მიერ 14 აგვისტოს გავრცელებულ ინფორმაციაში.
სამინისტროს ინფორმაციით, შსკ-ს სხდომაზე განსახილველ საკითხთა შორის არის კონფლიქტის მოგვარების სამშვიდობო პროგრამის შემუშავებისთვის ერთობლივი ჯგუფის მუშაობის დაწყება; კონფლიქტის მხარეთა სამართალდამცავი ორგანოების ერთობლივი მუშაობა; კონფლიქტის ზონაში არსებული სიტუაცია და დემილიტარიზაციის დაწყება; ეკონომიკური რეაბილიტაციის პროცესის დაწყება.
This post is also available in: English (ინგლისური) Русский (რუსული)