ევროკომისიამ გაფართოების მეორე ანგარიში გამოაქვეყნა

ევროკომისიამ ევროკავშირის კანონთა კრებულთან (EU acquis) საქართველოს შესაბამისობის შესახებ ანგარიში გამოაქვეყნა. ანგარიში გაწევრიანებისთვის ქვეყნის მზაობას აფასებს.

ევროკომისიის პრესრელიზში ხაზგასმულია ეუთო/ოდირის დასკვნები საქართველოში ჩატარებული საპარლამენტო არჩევნების შესახებ, სადაც აღნიშნულია, რომ დამკვირვებელმა „გამოავლინა რამდენიმე ხარვეზი, რომელსაც დაძაბულ და ძლიერ პოლარიზებულ გარემოში ჰქონდა ადგილი“ და ხაზგასმით აღნიშნა, რომ „ეს წინასწარი დასკვნები ადასტურებს ყოვლისმომცველი საარჩევნო რეფორმის საჭიროებას, რაზეც უკვე  იყო საუბარი წინა საკვანძო რეკომენდაციებში“.

ანგარიშში ნათქვამია, რომ კომისიის შარშანდელი რეკომენდაციები ადამიანის ფუნდამენტურ უფლებებთან დაკავშირებით „არ შესრულდა“. ანგარიშის კომენტირებისას, ევროკავშირის ელჩმა პაველ ჰერჩინსკიმ განაცხადა: „ნება მიბოძეთ, მკაფიოდ ვთქვა: ეს [უკუსვლა სასამართლო სისტემასა და ფუნდამენტურ უფლებებში] უპრეცედენტოა ქვეყნისთვის, რომელიც ევროკავშირში გაწევრიანებისკენ ისწრაფვის“.

ელჩმა ხაზგასმით აღნიშნა, რომ „საქართველოს კანდიდატის სტატუსი მიენიჭა იმის გათვალისწინებით, რომ გადაიდგმებოდა ცხრა ნაბიჯი – ძირითადად კანონის უზენაესობასა და დემოკრატიასთან დაკავშირებით. სამწუხაროდ, საქართველოს ხელისუფლების მხრიდან არ ყოფილა საკმარისი პოლიტიკური მზაობა აუცილებელი რეფორმების განსახორციელებლად“. ევროკომისიამ, თავის მხრივ, განაცხადა, რომ მომდევნო წელს, საქართველომ უნდა გააუქმოს კანონი უცხოური გავლენის გამჭვირვალობის შესახებ, ასევე გააუქმოს საკანონმდებლო პაკეტი ოჯახური ღირებულებებისა და არასრულწლოვანის დაცვის შესახებ.

ანგარიშში აღნიშნულია, რომ საქართველოს შესაბამისობის დონე ევროკავშირის ერთიან საგარეო და უსაფრთხოების პოლიტიკასთან მნიშვნელოვნად დაბალ, 49%-ს შეადგენს (თუმცა წინა ციკლის დროს  44% იყო) და რომ „საქართველოს 2023 წლის ივნისიდან არ მიუღია მონაწილეობა ევროკავშირის კრიზისების მართვის მისიებსა და ოპერაციებში ერთიანი უსაფრთხოებისა და თავდაცვის პოლიტიკის ფარგლებში“.

ანგარიშში ასევე ხაზგასმულია, რომ „საანგარიშო პერიოდში მნიშვნელოვნად გაიზარდა პირდაპირი ფრენების რაოდენობა სხვადასხვა რეისებზე რუსეთისკენ და რუსეთიდან“, თუმცა ასევე ნათქვამია, რომ „საქართველო თანამშრომლობდა ევროკავშირთან სანქციების გვერდის ავლის თავიდან ასაცილებლად“.

„ევროკავშირი მხარს უჭერს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში და 2008 წლიდან ჩართულია კონფლიქტების მშვიდობიანი მოგვარების ძალისხმევაში, მათ შორის ევროკავშირის სადამკვირვებლო მისიისა და სამხრეთ კავკასიაში ევროკავშირის სპეციალური წარმომადგენლის მეშვეობით“, – ხაზგასმულია ანგარიშში.

ელჩმა ჰერჩინსკიმ ანგარიშის სულისკვეთება შეაჯამა: „წელს საქართველომ უკან დაიხია, ხოლო სხვა კანდიდატი ქვეყნებმა წინ წაიწიეს, რამდენიმე მათგანმა გაწევრიანების შესახებ მოლაპარაკებები გახსნეს“.

მან განაცხადა, რომ ევროკავშირის კარი ღია რჩება, თუმცა გაფართოების პროცესი დამსახურებაზე დაფუძნებული პროცესია. „ვთავაზობ ხელისუფლებას ძალიან დიდი ყურადღებით წაიკითხოს გაფართოების შესახებ ეს ანგარიში. ის გვთავაზობს მკაფიო გზას ხელახალი ჩართულობისკენ და გზამკვლევს ევროკავშირში საქართველოს შესაძლო წევრობისკენ. მაგრამ მისი განხორციელება მოითხოვს ჭეშმარიტ პოლიტიკურ ნებას და დაბრუნებას ჩვენი უპირობო პრინციპებისა და ღირებულებებისადმი, რომლებზედაც ევროკავშირი არის დაფუძნებული“.

ქვემოთ მოცემული ცხრილი ასახავს საქართველოს მზაობის შეფასებას სხვადასხვა სფეროებში:

ასევე წაიკითხეთ:

• 03/02/2023 – ევროკომისიამ ევროკავშირის კანონთა კრებულთან შესაბამისობის შესახებ ანალიტიკური ანგარიშები გამოაქვეყნა

This post is also available in: English (ინგლისური) Русский (რუსული)