ახალი ამბები

საქართველო ოქტომბრის კიბერშეტევაში რუსეთს ადანაშაულებს

Tags

საქართველო საგარეო საქმეთა სამინისტროს მიერ 20 თებერვალს გავრცელებული ინფორმაციით, გასული წლის ოქტომბერში საქართველოში მომხდარი „ფართომასშტაბიანი“ კიბერშეტევა „დაიგეგმა და განხორციელდა რუსეთის ფედერაციის შეიარაღებული ძალების გენერალური შტაბის მთავარი სამმართველოს მიერ“.

„საქართველო გმობს აღნიშნულ კიბერშეტევას, რაც ეწინააღმდეგება საერთაშორისო სამართლის პრინციპებსა და ნორმებს და წარმოადგენს საქართველოს სუვერენიტეტის მორიგ ხელყოფას, მიმართულს ქვეყნის ევროპული და ევრო-ატლანტიკური ინტეგრაციის და დემოკრატიული განვითარების წინააღმდეგ“, – ნათქვამია სამინისტროს განცხადებაში.

უწყების განმარტებით, „მომხდარი ხაზს უსვამს ეროვნულ დონეზე კიბერუსაფრთხოების განმტკიცებისკენ საქართველოს მთავრობის მხრიდან მიმართული ძალისხმევის მნიშვნელობას“ და „კიდევ ერთხელ მოწმობს კიბერუსაფრთხოების საკითხებზე საერთაშორისო პარტნიორობის ჩამოყალიბების აუცილებლობას“.

საგარეო საქმეთა სამინისტროში აცხადებენ, რომ „საქართველო მომავალშიც გააგრძელებს მჭიდრო თანამშრომლობას პარტნიორებთან ეროვნულ დონეზე კიბერუსაფრთხოების გაძლიერებით მიზნით, რათა მომავალში მინიმუმამდე იქნას დაყვანილი შესაბამისი რისკები და პოტენციური საფრთხეები“. უწყება საერთაშორისო თანამეგობრობას „აღნიშნული ფაქტის“ სათანადო შეფასებისკენ მოუწოდებს.

საქართველოში საჯარო და კერძო უწყებათა ვებგვერდებზე კიბერშეტევა 2019 წლის 28 ოქტომბერს განხორციელდა. ათასობით ვებგვერდზე შესვლისას, ეკრანზე საქართველოს ყოფილი პრეზიდენტის მიხეილ სააკაშვილის ფოტო ჩნდებოდა ინგლისურენოვანი წარწერით – I’ll be back (მე დავბრუნდები).

This post is also available in: English (ინგლისური) Русский (რუსული)

Related Articles

Back to top button