ახალი ამბები

პუტინი საქართველოსთან საჰაერო მიმოსვლას კრძალავს და ტურისტების გაყვანის დავალებას იძლევა

Tags

2019 წლის 8 ივლისიდან რუსეთის ავიაკომპანიებს რუსეთიდან საქართველოს ტერიტორიაზე მოქალაქეების საჰაერო გადაყვანა (მათ შორის კომერციული) დროებით ეკრძალებათ. ამის შესახებ რუსეთის ფედერაციის პრეზიდენტის ვლადიმირ პუტინის 21 ივნისის ბრძანებაშია ნათქვამი.

დოკუმენტში, სახელწოდებით – „რფ-ის ეროვნული უშიშროების უზრუნველყოფის ცალკეული ზომების და რფ-ის მოქალაქეების დანაშაულებრივი და სხვა კანონსაწინააღმდეგო ქმედებებისგან დაცვის შესახებ“, პუტინი რუსულ ტუროპერატორებს საქართველოში ტურისტების გადაყვანისგან თავის შეკავების რეკომენდაციითაც მიმართავს.

თავისი ბრძანებით პუტინმა მთავრობას ასევე დაავალა, რომ საქართველოში მყოფი რფ-ის მოქალაქეების და მათი ტვირთის დაბრუნება უზრუნველყოს. ხოლო საგარეო საქმეთა სამინისტროს ავალებს, რომ „უზრუნველყოს კოორდინაცია საქართველოს ხელისუფლებასთან რფ-ის მოქალაქეების უსაფრთხოების უზრუნველყოფასა და რუსეთში მათი დაბრუნების საკითხების გადაწყვეტისას“.

პუტინის მიერ გამოცემულ დოკუმენტში ასევე აღნიშნულია, რომ ამ ზომების მიღება რუსეთის ეროვნული უშიშროების უზრუნველყოფისა და „ძალადობრივი ან სხვა სახის კანონსაწინააღმდეგო ქმედებებისგან“ რუსეთის მოქალაქეების დაცვის მიზნისთვის არის აუცილებელი.

უკვე მეორე დღეა თბილისის ცენტრში საპროტესტო აქციები იმართება, რომლის მონაწილენიც რუსეთის სახელმწიფო სათათბიროს დეპუტატის სერგეი გავრილოვის საქართველოს პარლამენტში ვიზიტს და პარლამენტის სხდომათა დარბაზში მის ქმედებებს აპროტესტებენ. გუშინ საღამოს დაწყებული აქცია ხელისუფლებამ გვიან ღამით ძალის გამოყენებით დაშალა, რა დროსაც 240 მოქალაქე დაშავდა, ხოლო აქციის 305 მონაწილე სამართალდამცველებმა დააკავეს.

გუშინ განვითარებული მოვლენების შემდეგ, დღეს პარლამენტის თავმჯდომარე ირაკლი კობახიძე გადადგა, ხოლო ოცნების კიდევ ერთმა დეპუტატმა ზაქარია ქუცნაშვილმა დეპუტატის მანდატის დატოვების შესახებ მზაობა გამოხატა. 

პარლამენტის წინ საპროტესტო აქცია დღეს საღამოს შვიდ საათზე კვლავ განახლდა. აქციის მონაწილეები შს მინისტრის გიორგი გახარიას გადადგომას და აქციის დარბევისას დაკავებული მოქალაქეების პატიმრობიდან გათავისუფლებას მოითხოვენ.

This post is also available in: Русский (რუსული)

მსგავსი/Related

Back to top button